स्वक्वःगु जनआन्दोलन यायेगु : प्रचण्ड
एकीकृत नेकपा (माओवादी)या अध्यक्ष पुष्पकमल दाहाल 'प्रचण्डं' राष्ट्रवादी, देशभक्त व नागरिक समाज सहितया मोर्चा देयेकाः स्वक्वःगु जनआन्दोलन यायेगु खँ धयादीगु दु ।
आइतवाः मकवानपुरया दामनय् च्वंगु शिखरकोटय् निर्माण याःगु मदुम्ह रुपचन्द्र विष्ट 'थाहा'या झ्वाताः उल्लेज्या यायेगु झ्वलय् अध्यक्ष प्रचण्डं आन्दोलनं राष्ट्रघाती, प्रतिक्रियावादी, दलाल व अवसरवादीतय्त समाप्त याइगु दाबी यानादिल ।
प्रधानमन्त्री माधवकुमार नेपातया सरकारयात 'बुख्यांचा:'या सरकार धासें थंज्याःगु सरकारं जनतायात दास जक देयेकीगु धयादिल । अथेहे वेयेकलं नेपाःया इतिहासय थंज्याःगु सरकार गुबले हे गठन मजूगु धयादिल । वयेकलं थ्व सरकारं गणतन्त्रया विरुद्ध ज्या यानाच्वंगु धासें थुकीया विरुद्ध जनता थःहे न्ह्या वनेमाःगु बीचाः नं प्वंकादिल ।
पुलांम्ह प्रधानमन्त्री नं जुयादिम्ह अध्यक्ष प्रचण्डं छुं दलत एमाले नेतृत्वया सरकारयात समर्थन यानाः संविधानसभायात विगठन यायेगु षड्यन्त्र यानाच्वंगु द्वपं बियादिल । अथेहे वयेकलं थंज्याःगु दलतय्सं माओवादीयात हाकनं जंगल छ्वेयेत स्वयाच्वंगु धासें आः माओवादी शहरय् च्वनाः शान्ति प्रकृयाया लडाँइ ल्वाइगु धयादिल ।
