मिलेजुया ज्या यानादिसं : कोइराला
कांग्रेस सभापति गिरिजाप्रसाद कोइरालां शनिवाः कांग्रेस संसदीया दलया नेताय् निर्वाचित रामचन्द्र पौडेलयात दक्व नेता व कार्यकर्ता नाप मिलेजुया ज्या यायेत निर्देशन बियादीगु दु ।
दलया नेताय् निर्वाचित जुइधुंकाः आइतवाः पार्टी सभापति कोइरालायात नापलायेत कोइराला निवास महाराजगंज थ्यंकादिम्ह पौडेलयात थंज्याःगु निर्देशन बियादीगु खः । सभापति कोइरालां प्रजातन्त्रय् सुंनं मत्याइगु व सुंनं मबुइगु जूगुलिं निर्वाचनय् बुपिं दक्वसित मिलेयानाः न्ह्याः वनेत निर्देशन बियादीगु खः । अथेहे कोइरालां संसदय् प्रभावकारी भुमिका म्हितेत नं पौडेलयात निर्देशन बियादीगु खः ।
शनिवाः जूगु संसदीय दलया निर्वाचनय् पौडेलं पुलाम्ह प्रधानमन्त्री व कांग्रेसया वरिष्ठ नेता शेरबहादुर देउवायात झिंस्वंगु मत अन्तरं त्याकादीगु खः । पौडेलं खुइछगू मत हयादीगु खसाः देउवाया पक्षय् पीच्यागू मत जक वःगु खः । म्हिग निर्वाचित जुइवं पौडेलं कांग्रेस उपसभापति सुशील कोइरालायात नापलानादीगु खः ।
