कांग्रेस संसदीय दलया नेताय् पौडेल
नेपाली कांग्रेसया संसदीय दलया नेता उपसभापति रामचन्द्र पौडेल जुयादीगु दु । पौडेलं संसदीय दलया निक्वःगु चरणया मतदानय् प्रितद्वन्दी शेरबहादुर देउवायात बूकादीगु खः । पौडेलं देउवायात झिंस्वंगु मतया अन्तरं त्यकादीगु खः । मतगणना कथं पौडेलं खुइछगू मत हयादीगु खसाः देउवाया पक्षय् पीच्याःगु मत जक लाःगु खः ।
थ्वस्वयां न्ह्यः जूगु न्हापांगु चरणया मतदानय् प्यम्ह उम्मेदवारत सुया नं आवश्यक मतल्या: मगाःगुलिं निक्वःगु चरणया निर्वाचन यायेमाःगु खः । न्हापांगु चरणया मतदानय् शेरबहादुर देउवां पीन्याःगु, रामचन्द्र पौडेलं स्वीगुंगू, केबी गुरुङ व सुप्रभा घिमिरें झिंनिगू-झिंनिगू मत हयादीगु खः ।
कांग्रेस संसदी दलया विधान कथं नेताय् निर्वाचित जुइत अनिवार्य न्यय्छगू प्रतिशत मत हेयेमाःगु प्रावधान दु । अथे मजुसाः अप्व मत ह:पिं निम्ह दथुइ पुनःनिर्वाचन जुइगु प्रावधान दु ।
मुक्कं सच्छि व झिंप्यम्ह दुजः दुगु कांग्रेसया संसदीय दलय् सच्छि व गुम्ह नेतातय्सं जक मतदानय् ब्वति काःगु खः । कांग्रेस सभापति गिरिजाप्रसाद कोइराला, नेतात डा. रामशरण महत, शशांक कोइराला, निलाम्बर आचार्य व बलदेव शर्मा मजगैयां मतदानय् ब्वति कयामदी
अथेहे थौं संसदीय दल कार्यसमितिइ झिम्ह दुज:त निर्विरोध जूगु दु । निर्विरोध जूगुली मधेशी कोटापाखें किरण यादव, अमृतलाल राजवंशी व अजयकुमार चौरसिया दुसा: दलितपाखें कविता सरदार बातर व अन्यलय् जगदीशनरसिंह के.सी. व पुरुषोत्तम बस्नेत निर्विरोध जुयादीगु ख: । अथेहे निर्विरोध जुपिं मेपिं दुजलय् सुदूरपश्चिमपाखें रमेश लेखक, मध्यपश्चिमपाखें वादसाह कुर्मी, मध्यमाञ्चलपाखें नवीन्द्रराज जोशी व पश्चिमाञ्चलपाखें अर्जुनकुमार जोशी दु ।
झिंन्ह्य दुज:या कार्यसमितिया निंतिं मेपिं दुज:तय्त नं निर्विरोध देयेकीगु कुत: जुयाच्वंगु दु । कांग्रेस संसदीय दलया उपनेता धासा: मनोनीत यायेगु प्रावधान दु ।
नेपाली कांग्रेस संसदीय दलया नेताया निर्वाचनया निंतिं वरिष्ठ नेता शेरबहादुर देउवा, उपसभापति रामचन्द्र पौडल, महामन्त्री कुलबहादुर गुरुङ व केन्द्रीय दुज: सुप्रभा घिमिरें मनोनयन दर्ता यानादीगु ख: ।
महामन्त्री कुलबहादुर गुरुङयात नेतात लक्ष्मण घिमिरे, ललिता किङरिङ मगर व हर्षजीत लामां संसदीय दलया नेताया निंतिं प्रस्ताव यानादीगु खसा: निर्मला प्रसाई, हिरा गुरुङ्ग व लीला सुब्बां समर्थन यानादीगु ख: ।
अथेहे वरिष्ठ नेता शेरबहादुर देउवायात गोपालमान श्रेष्ठ, विमलेन्द्र निधि व रमेश रिजालं प्रस्ताव यानादीगु खसा: कविता सुनार, कल्पना सोब व शम्भु हजारिया पासवानं समर्थन यानादीगु ख: ।
सुप्रभा घिमिरेयात नरहरि आचार्य, दीपकुमार उपाध्याय व राधेश्याम अधिकारीं संसदीय दलया नेताया निंतिं प्रस्ताव यानादीगु ख: । वयेकयात पूर्णबहादुर खड्का, रामसरोज यादव व ध्यानगोविन्द रञ्जितं समर्थन यानादीगु ख:
उपसभापति रामचन्द्र पौडेलयात प्रकाशमान सिहं, रामकृण्ण यादव व अजय द्धिवेदीं प्रस्ताव या:गु खसा: प्रमिला राई, वीरेन्द्र माझी व गणेशबहादुर खड्कां समर्थन यानादीगु ख: ।
