मेननं राष्ट्रपति, प्रधानमन्त्री लगायत राजनीतिक दलया नेतात नापलात
थौं सुथय् नेपाः भ्रमणय् झायादिम्ह भारतीय शिवशंकर मेननं राष्ट्रपति, प्रधानमन्त्री व थीथी राजनीतिक दलया शीर्ष नेतात नापलाना शान्ति प्रकृया, संविधान निर्माण, वर्तमान राजनीतिक अवस्था, सीमा समस्या लगायतया बारे खँल्हाबंला यानादीगु दु ।
भारतीय विदेश सचिव शिवशंकर मेननं थौं राष्ट्रपति डा. रामवरण यादव नाप खँल्हाबंला यानादीगु दु । राष्ट्रपति भवन सितल निवासय् जूगु खँल्हाबंलाय् वर्तमान राजनीतिक अवस्था शान्ति प्रकृया व संविधान निर्माणया विषयस खँल्हाबंला जूगु खः ।
अथेहे प्रधानमन्त्री माधवकुमार नेपाल व भारतीय विदेश सचिव शिवशंकर मेनन दथुइ खँल्हाबंला जूगु दु । प्रधानमन्त्री निवास बालुवाटारय् जूगु खँल्हाबंलाय् नेपाःया सीमा अतिक्रमणया विषयस नेपाः व भारतया उच्चस्तरिय सहमति कायम यानाः समस्याया निकास मालेगु बारे सहलह जूगु खः । प्रधानमन्त्रीया परराष्ट्र सल्लाहार राजन भट्टराईया कथं सचिव मेननं कांग्रेस सभापति गिरिजाप्रसाद कोइराला व माओवादी अध्यक्ष पुष्पकमल दाहाल 'प्रचण्ड' प्रधानमन्त्री जुयादीगु ईलय् भारत भ्रमणया ईलय् जूगु सहमति व सम्झौतायात निरन्तरता बीगु खँ बारे सहसह जूगु खः ।
मेननं नेपाःया शान्ति प्रकृया, न्हूगु संविधान निर्माण, माओवादी सरकारपाखें पिहावनेमाःगु व न्हगू सरकारयात पूर्णताय् खनेदुगु समस्याया बारे च्यूता प्वंकादीगु खः ।
अथेहे कांग्रेस सभापति गिरिजाप्रसाद कोइरालानाप नं वयेकलं नापलाना खँल्हाबंला यानादीगु दु । प्रधनमन्त्री नापया खँल्हाबंला लिपां कोइराला निवास महाराजगंज थ्यंकादीगु खः । कोइराला नापया खँल्हाबंलाय् वयेकलं दलत दथुइया सहमति बः बियादीगु खः । कोइरालानाप वयेकलं सीमा विवाद, वर्तमान राजनीतिक परिस्थिति विषयस नं सहलह यानादीगु खः ।
भारतीय विदेश सचिव शिवशंकर मेननं थौं हे माओवादी अध्यक्ष पुष्पकमल दाहाल 'प्रचण्ड'यात नं नापलाना राजनीतिक सहमतिया आधारय् न्ह्या: वनेत सुझाव बियादीगु खः । अथेहे माओवादी लडाकूया समायोजन, पुनस्थापना व व्यवस्थापन ज्या मसिधतल्ले नेपाया शान्ति प्रकृया हाथ्यापूर्ण जूगु खँ धयादीगु खः । लिसःलय् प्रचण्डं थः शान्ति प्रकृया व संविधान निर्माण ज्याय् प्रतिबद्ध जूगु खँ धयादिल । अथेहे मेनन व प्रचण्ड दथुइ सीमा विवाद बारे नं सहलह जूगु खः ।
एमाले अध्यक्ष झलनाथ खनाल नाप नं नापलानादिया विदेश सचिव मेननं सन् १९५०या मैत्री सन्धि पुनरावलोकन यानाः सीमा विवाद ज्यंकेमाःगु बीचाः प्वंकादीगु खः । अथेहे सचिव मेननं उच्चस्तरीय छानबिन समिति गठन यानाः सीमा विवाद ज्यंकेमाःगु खँ धयादीगु जानकारी एमाले अध्यक्ष खनालं बियादिल ।
