माओवादी पोलिटब्यूरो बैठक सोमवाः तकया निंतिं स्थगित
न्यान्हु न्ह्यः निसें न्ह्यानाच्वंगु एकीकृत नेकपा (माओवादी)या पोलिटब्यूरो बैठक सोमवाः तकया निंतिं स्थगित जूगु दु ।
शनिवाः च्वंगु बैठकय् अध्यक्ष पुष्पकमल दाहाल 'प्रचण्ड'या प्रतिवेदनय् वरिष्ठ नेता मोहन वैद्य 'किरण', डा. बाबुराम भट्टराई व नारायणकाजी श्रेष्ठ प्रकाशं टिप्पणी यानादीगु खः । अध्यक्षया राजनीतिक प्रतिवेदनय् असहमति प्वंकूसें फरक प्रतिवेद न्ह्यब्वयेगु तयारी यानाच्वंम्ह नेता किरणं शनिवाः मौखिक रुपं अध्यक्षया प्रतिवेदनय् असहमति प्वंकादीगु खः ।
वयेकलं अध्यक्ष दाहालं न्ह्यब्वयादीगु झिंगुगू पृष्ठ तःहाकःगु राजनीतिक प्रतिवेदन अपूर्ण जूगु खँ धयादीगु खः । नेता किरणं अध्यक्षया प्रतिवेदनय् न्ह्यथंनातःगु नागरिक सर्वोच्चताया निंतिं माओवादीं यानाच्वंगु आन्दोलनयात निरन्तरता बिया थःगु नेतृत्वया राष्ट्रिय सरकार देयेकेगु खँ अपूर्ण जूगु धासें उलिं जक क्रान्तियात गति बीमफइगु खँ धयादीगु खः ।
बैठकय् नेता बाबुराम भट्टराई व नारायणकाजी श्रेष्ठ प्रकाशं धासाः अध्यक्षया प्रतिवेदनय् समर्थन यानादीगु खः । निम्ह नेतातय्सं जनमुखी संविधान निर्माणपाखे पार्टीया दक्वं ध्यान केन्द्रीत जुइमाःगु बीचाः प्वंकादीगु खः ।
अध्यक्ष प्रचण्डया प्रतिवेदनय् नेतातय्सं टिप्पणी यायेधुंकाः दक्वसियां बीचाः दुथ्याकाः प्रतिवेदन संशोधन याइगु ज्याझ्वः दु ।
