पुलांगु सरकारं द्वंकूगु ज्या जक भिंकाःगु : प्रधानमन्त्री
प्रधानमन्त्री माधवकुमार नेपालं प्रधानसेनापति प्रकरणय् पुलांगु सरकारं द्वंकूगु ज्या न्हयू सरकारं भिंकूगु खँ धयादीगु दु ।
शनिवा: येँय् क्षेत्र नम्बर २ डाँछीइ एमाले गाँउ कमिटीं वयेकया सम्मानय् याःगु ज्याझ्वलय् न्ववानादिसें प्रधानमन्त्री नेपालं माओवादीं सरकारया निर्णय विरुद्ध आन्दोलनया घोषणाया औचितय मदुगु धासें माओवादी सरकार द्वंकूगु ज्या थःगु नेतृत्वया सरकारं भिंकूगु दावी यानादिल ।
प्रधानमन्त्री नेपालं माओवादीयात अरजाक गतिविधि त्वताः सहमति व सहकार्य यानाः न्ह्याः वनेत नं इनाप यनादिल । वयेकलं न्हूगु संविधान निर्माणया निंतिं राजनीतिक दलतय् सहमति बिनाः पूमवनीगु धासें माओवादीयात नं सहमति वयेत इनाप यानादिल ।
सरकारं बिहिवाः माओवादी सरकारं प्रधानसेनापति रुक्मांग कटवालया याःगु कारवाही लित काःगु खसाः राष्ट्रपति डा. रामवरण यादवं ल्ह्वंगु पला नं संवैधानिक जूगु निर्णय याःगु खः । थ्व निर्णयया विरुद्धः माओवादीया शुक्रवाः च्वंगु पोलिटब्यूरो बैठकं आन्दोलनया ज्याझ्वःया घोषणा याःगु खः ।
