भारतीय विदेश सचिव मेनन येँय्
भारतीय विदेशसचिव शिवशंकर मेनन येँय् झयादीगु दु । भारतीय विशेष विमानं वयेक साढे नौ बजे त्रिभुवन विमानस्थलय् अवतरण यानादीगु खः । वयेकलयात परराष्ट्र सचिव ज्ञानचन्द्र आचार्यं लसकुस यानादीगु खः ।
भारतीय विदेश सचिव मेनन प्रधानमन्त्री माधवकुमार नेपालया सरकारयात नैतिक समर्थन क्यनेत व प्रधानमन्त्रीयात भारत भ्रमणय् ब्वनेत नेपाः झयादीगु खँ परराष्ट्र मन्त्रालयं धा:गु दु ।
भारती दुतावासया कथं सचिव मेननं प्रधानमन्त्री लगयात नेपाःया थीथी मन्त्रीत व नेतातय्त नापलानादीगु ज्याझ्वः दु । विदेश सचिव मेननं थौं राष्ट्रपति डा. रामवरण यादव, प्रधानमन्त्री माधवकुमार नेपाल, कांग्रेस सभापति गिरिजाप्रसाद कोइराला, माओवादी अध्यक्ष पुष्पकमल दाहाल 'प्रचण्ड' व एमाले अध्यक्ष झलनाथ खनालयात नापलानादीगु ज्याझ्वः दु ।
अथेहे वयेकलं कन्हय् पशुपति वनाः थःगु न्हि शुरु यानादीगु जूगु दु । वयेकलं कन्हय् उपप्रधानमन्त्री विजयकुमार गच्छदार, गृहमन्त्री भिम रावल, रक्षामन्त्री विद्या भण्डारी, परराष्ट्रमन्त्री सुजाता कोइराला व परराष्ट्र सचिव ज्ञानचन्द्र आचार्ययात नापलानादीगु ज्याझ्वः दु ।
कन्हय् हे वयेकया सम्मानय् परराष्ट्र सचिव आचार्यं याक एण्ड यती होटल बीयादीगु ज्योनाय् ब्वति कयादीगु खँ दुसाः न्हिनय् होटल द्वारिकाय् पत्रकार सम्मेलन यानाः विशेष विमानं भारत लिहांझयादीगु ज्याझ्वः दु ।
अथेहे भारतीय विदेश सचिव मेननयात त्रिभुवन अन्तराष्ट्रिय विमान स्थलय् हाकूगु ध्वाँय् क्यंपिं रिभोलुसनरी लेफ्ट व एकीकृत नेपा मोर्चाया कार्यकर्तातय्त प्रहरी ज्वंगु दु । नेपालय् भारतीय अधिकारीया हस्तक्षेप व भारतीय विस्तारवादया विरुद्ध हाकूगु ध्वाँय् क्यंपिं रिभोलुसनरी लेफ्ट विङया महासचिव नारायण श्रेष्ठ, केन्द्रीय दुज:त माधव थापा, विमल गौतम, पुण्य गौतम, विद्यार्थी नेतात नेत्र के.सी, ओम प्रकाश, प्रविन शर्मा, शिव गौतम व एकीकृत नेपाल मोर्चाया अध्यक्ष फडिन्द्र नेपाल, उपाध्यक्ष वि. एन शर्मा, सुजित मैनाली लगायत कार्यकर्तातय्त प्रहरीं ज्वना यंकूगु ख: ।
