माओवादी सर्वशक्तिमान जनप्रतिनिधिसभाया पक्षय्
एकीकृत नेकपा (माओवादीं) जनप्रतिनिधिसभा सर्व्रशक्तिमान जुइगु कथंया न्हूगु संविधानया स्वरुप तयार याःगु दु ।
माओवादीया शुक्रवाः च्वंगु पोलिटब्यूरो बैठकं न्हूगु संविधानया खाका क्वछीगु खः । प्रस्तावित खाकाय् दकलय् शक्तिशाली केन्द्रिय जनप्रतिनिधिसभा जुइगु व उकीं हे राष्ट्रपतिया निर्वाचन याइगु खँ न्ह्यथंनातःगु दु । माओवादीं थ्वस्वयां न्ह्यः प्रत्यक्ष निर्वाचन मार्फत राष्ट्रपतिया चयन यायेमाःगु व वहे सर्वशक्तिमान जुइगु प्रस्ताव याःगु खः ।
माओवादीं जनप्रतिनिधिसभाय् दक्वं क्षेत्र व समूहया समान सहभागिताया निंतिं मिश्रित निर्वाचन प्रणालीया प्रस्ताव याःगु दु । मिश्रित जुसां दक्वं दुजःत जनअनुमोदित जुइमाःगु खँ न्ह्यथंनातःगु खँ माओवादी प्रवक्ता दिनानाथ शर्मा जानकारी बियादिल । अथेहे माओवादीं न्यायपालिकाया चयन नं जनप्रतिनिसभा मार्फत यायेगु व्यवस्थाया प्रस्ताव न्ह्यब्वःगु दु ।
स्वन्हु तक सहलह यानाः माओवादीया पोलिटब्यूरो बैठकं न्हूगु संविधानया खाका तयार याःगु खः । खाकाय् प्रधानमन्त्रीया धासाः व्यवस्था यानातःगु मदु । प्रवक्ता शर्माया कथं प्रधानमन्त्रीया व्यवस्था जुसाः शक्ति विभाजन जुया द्वन्द्व अप्वयेफुगुलिं दक्वं अधिकार राष्ट्रपतिलय् हे निहित जुइगु व्यवस्था याःगु खः ।
शुक्रवाः बैठकय् माओवादी अध्यक्ष पुष्पकमल दाहाल 'प्रचण्डं' लोकतन्त्रिक अधिकार सहितया न्हूगु संविधान देयेकेमाःगु खँ बः बियादीगु खः । वयेकलं संघीय संरचना व लोकतान्त्रिक अधिकार न्हूगु संविधानया केन्द्रय् जुइगु प्रष्ट यानादिल ।
