कोइरालां संसदीय दलया नेताया निंतिं उम्मेदवारी मबीगु
नेपाली कांग्रेसया सभापति गिरिजाप्रसाद कोइरालां थम्हं संसदीय दलया नेताया निंतिं उम्मेदवारी मबीगु खँ धयादीगु दु ।
शुक्रवाः संसदीय दलय् उम्मेदवारी ब्यूपिं प्यम्ह नेतातय्त थःगु हे निवासय् सःता उमेर व स्वास्थ्यया कारणं थः थप जिम्मेवारी कायेत अनइच्छुक जूगु खँ धयादीगु खः ।
संसदय दलया नेताया निंतिं उम्मेदवारी बियादिपिं वरिष्ठ नेता शेरबहादुर देउवा, उपसभापति रामचन्द्र पौडेल, महामन्त्री कुलबहादुर गुरुङ व नेतृ सुप्रभा घिमिरेयात कोइराल निवास सःता सहमतिया निंतिं कुतः यायेत सभापति कोइरालां इनाप यानादीगु दु । वयेकलं प्यम्हं उम्मेदवार नाप ज्यूसाः मिले जुया वनेत इनाप यानादीगु खः । मखुला लोकतान्त्रिक निर्वाचन मार्फत नेता चयन यानाः 'स्पोर्टस म्यानसिप' क्यनेत इनाप यनादीगु खः ।
शनिवाः जुइगु कांग्रेसया संसदीय दलया निर्वाचनया निंतिं प्यम्हं नेतात व्यस्थ जूगु ईलय् कोइरालां थ्व इनाप यानादीगु खः ।
