मन्त्रिपरिषदया निर्णय बारे एमाले दुने हे विवाद
एमालें आधिकारीक धारण पितब्यूगु मदुनी : खनाल
सत्ता नेतृत्व यानाच्वंगु नेकपा (एमाले) दुने हे बिहिवाः सरकारं याःगु निर्णय प्रति तीव्र विवाद जूगु दु । एमाले सभासदतय्सं राष्ट्रपतिया पलाःयात संवैधानिक जूगु धकाः धाये मफैगु खँ तयेवं विवाद शुरु जूगु खः ।
शुक्रवाः च्वंगु एमाले संसदीय दलया बैठकय् सभासदतय्सं राष्ट्रपतिया पलाः असंवैधानिक जुसां सरकारं थुकीयात संवैधानिक धकाः निर्णय याःगु धासें नेतृत्वया कडा आलोचना याःगु दु । थ्व विवाद लिपाः मन्त्रिपरिषदं याःगु निर्णययात पार्टीं पाखें अनुमोदन यायेत थाकूइगु स्थिति वःगु दु ।
सभासदतय्सं राष्ट्रपतिया थ्व पलाःयात भिंकेगु बारे पार्टी न्ह्यायेमाःगु ईलय् मन्त्रिपरिषदं थंज्या:गु निर्णया याःगु धासें आपत्ती प्वंकूगु खः । छुं सभासदतय्सं जननिर्वाचित सरकारं याःगु निर्णय राष्ट्रपतिं हस्तक्षेप याये मदुगु बीचाः प्वंकूगु दु । अथेहे अदालतय् विचाराधिन खँ बारे सरकारं निर्णय याःगु धासें आपत्ती प्वंकूगु खः ।
सभासदतय्सं पार्टी नेतृत्वयात थुकीया बारे स्पष्ट जुइत धायेवं पार्टी अध्यक्ष झलनाथ खनालं एमालें राष्ट्रपतिया पला: बारे छुं नं निर्णय मयानीगु खँ धयादीगु दु । थ्व पलाः संवैधानिक वा असंवैधानिक धकाः एमालें आधिकारीक धारण पितब्यूगु मदुनी धासें वयेकलं सभासदतय् सुझावयात सकारात्मक रुपं कयाःगु धयादिल ।
अथेहे बैठकय् सभासदतय्सं पार्टी नेतात गुटबन्दी लगे जूगु धासें आलोचना याःगु दु । सभासदतय्सं पार्टी अध्यक्ष लगायत शीर्ष नेतात हे थंज्याःगु गुटबन्दी यायेगु ज्या लगेजूगु धासें नेतृत्व प्रति रोष प्रकट याःगु खः ।
बैठकय् विवाद अप्वयेवं प्रधानमन्त्री माधवकुमार नेपाल बीचे हे बैठक पाखें पिहांवनादीगु खः ।
