सरकारया निर्णय विरुद्ध माओवादीं संघर्ष याइगु
एमाले नेतृत्वया सरकारं बिहिवाः प्रधानसेनापतिया कारवाही बारे याःगु निर्णय प्रति एकीकृत नेकपा (माओवादीं) आपत्ती प्वंकूसें थुकीया विरुद्ध कडा संघर्ष याइगु जूगु दु ।
माओवादी पोलिटब्यूरो बैठकं सरकारया थ्व निर्णय प्रति आपत्ती प्वंकूसें आन्दोलनया ज्याझ्वः घोषणा याःगु दु । माओवादी प्रवक्ता दिनानाथ शर्माया कथं माओवादीं थुकीया शुरुवात थौं च्वनीगु व्यवस्थापिका संसद अवरोध यानाः न्ह्याकीगु जूगु दु । अथेहे थौं हे देयेन्यंक मसाल जुलुस पिथनेगु व आइतवाः देयेन्यंया सरकारी ज्याकू घेराउ याना: ठप्प यायेगु घोषणा याःगु दु । नापं प्रवक्ता शर्मा माओवादीं निगूगु चरणया आन्दोलन याकनं हे घोषणा याइगु धयादिल ।
अथेहे शुक्रवाः सुथय् सिंहदरवारय् च्वंगु माओवादी संसदीय बोर्डया बैठकय् बिहिवाः मन्त्रिपरिषदया बैठकं प्रधानसेनापतिया बारे न्हापाया सरकारं याःगु कारवाही लितकाःगु व राष्ट्रपतिया पलाः संवैधानिक जूगु धकाः याःगु निर्णय प्रत्ति माओवादी नेतातय्सं आपत्ती प्वंगूगु खः ।
माओवादी नेतातय्सं जननिर्वाचित सरकारं याःगु निर्णय यात हीकूगु धासें थ्व सरकार नं प्रतिगमनया निरन्तरता जूगु द्वपं ब्यूगु दु । माओवादी सरकारं निर्णय याःगु ईलय् अदालतय् विचाराधिन विषयस निर्णय याःगु धासें विरोध याइपिं थौं अदालतय् विचारधिन मुद्दाया बारे निर्णय याःगुलि आपत्ती प्वंकूगु दु ।
