राष्ट्रपति नाप जक चीकेगु अधिकार : कटवाल
प्रधानसेनापति रुक्मांग कटवालं प्रधानसेनापतियात राष्ट्रपितं बाहेक सुनां नं चीमेमफइगु दाबी यानादीगु दु ।
बिहिवाः सर्वोच्च अदालतयात लिखित लिसः छ्वया कटवालं कानुकी व्यवस्था बमोजिम नियुक्ति याइम्ह नाप जक हे थ्व अधिकार दइगु न्ह्यथंसें प्रधानसेनापतियात चीकेगु अधिकार राष्ट्रपति नाप जक दइगु धाःगु दु । कटवालं राष्ट्रपतिया निर्देशन विरुद्ध सर्वोच्च अदालतय् दायर जूगु रिटय् उगु लिसः छ्वःगु खः ।
कानुन व्याख्या सम्बन्धी ऐन २०१०य् नं नियुक्ति यायेत अख्तियार दुम्हेसिनं हे वर्खास्त याये दइगु व्याख्या याःगु धासें थःयात नियुक्ति यायेगु अधिकारीया कथं राष्ट्रपति जूगुलिं पदं चीकेगु अधिकार नं राष्ट्रपति याके जक दइगु खँ न्ह्यथंगु दु ।
कटवालं राष्ट्रपतिया निर्देशन कथं यथावत प्रधानसेनापतिया पदय् वहाल जुया संक्रमणकालीन ईलय् नः विचलित मजुसें राष्ट्रया सेवाय् लगेजुयाच्वनेगु खँ धाःगु दु । प्रधानसेनापति कटवालं निवेदनय् छु व गु कानुन व संविधानया उल्लंघन याःगु प्रष्ट उल्लेख मजूगुलिं रिट खारेज यायेमाःगु माग याःगु दु ।
माओवादी सरकारं थःयात प्रधानसेनापतिया पदं चीकेगु निर्णय संविधान व कानुनी प्रावधान विपरीत जूगु दाबी याःगु दु । माओवादीं वैशाष २० गते कटवालयात वर्खास्त याना रथी कुलबहादुर खड्गायात कामु सेनापति यायेवं राष्ट्रपतिं परमाधिपतिया हैसियतं कटवालयात पदय् बहाल जुइत निर्देशन ब्यूगु खः ।
राष्ट्रपतिया थ्व पलाः संविधान विपरीत जूगु धासें खारेज यायेत माग याना: बैशाख २१ गते इन्हुरेड इन्टरनेशनलया पाखें अभिवक्ता श्रीकृष्ण सुवेदी, रामकृष्ण काफ्ले व विदुरप्रसाद अधिकारीं मंकाः रिट दायर याःगु खः ।
