कटवालयात याःगु कारवाही लितकाल
मन्त्रिमण्डल बिस्तार लिपाः दकलय् न्हापांगु मन्त्रिपरिषदया बैठक थौं च्वंगु दु । थौं च्वंगु बैठकं माओवादी सरकारं प्रधानसेनापति रुक्माङ कटवालयात बर्खास्त यायेगु निर्णययात बदर यानाः पुर्नबहाली यायेगु निर्णय याःगु दु ।
बिहिवाः प्रधानमन्त्रीया ज्याकू सिंहदरवारय् च्वंगु मन्त्रिपरिषदया बैठकं राष्ट्रपति डा. रामवरण यादवं याःगु निर्णय संवैधानिक जूगु ठहर यासें प्रधानसेनापतिया निर्णय बदर याःगु दु । नापं बैठकं माओवादी सरकारं कायम मुकायम प्रधानसेनापति नियुक्त याम्ह कुलबहादुर खड्काया निर्णय नं लित काःगु दु ।
बैठक लिपा थौंया मन्त्रिपरिषदं तिनि सरकारया प्रवक्ताय् नियुक्त जुयादिह सूचना व संचार मन्त्री शंकर पोखरेलं बैठकं माओवादी सरकारं प्रधानसेनापतियात याःगु कारवाही लित काःगु जानकारी बियादीगु खः ।
अथेहे मन्त्रिपरिषदया बैठकं तराईया सशस्त्र पुचत नाप वार्ता यायेत शान्ति मन्त्री रकम चेम्जोङया संयोजकत्वय् वार्ता पुचः नं गठन यायेगु निर्णय याःगु दु ।
