मन्त्री ल्यय्त फोरमं गच्छदारयात व तलमोपां ठाकुरयात जिम्मा
एमाले नेतृत्वया सरकारय् ब्वति कायेगु निंतिं थःथःगु पार्टी पाखें सरकारय् वनीपिं नेतातय् नां ल्यय्त मधेशी जनअधिकार फोरम (गच्छदार पक्षं) उपप्रधानमन्त्री नापं पार्टी संसदीय दलया नेता विजयकुमार गच्छदारयात जिम्मा ब्यूगु दुसाः तराई-मधेश लोकतान्त्रिक पार्टीं पार्टी अध्यक्ष महन्त ठाकुरया जिम्मा ब्यूगु दु ।
बिहिवाः च्वंगु फोरमया अनौपचारीक बैठकं मन्त्रिमण्डलय् वनीपिनि नां ल्यय्गु जिम्मा गच्छदारयात ब्यूगु खः । बैठक लिपा उपप्रधानमन्त्री गच्छदारं फोरम व मधेशी मोर्चाया मेगू पार्टी तय्सं कन्हय् तकया दुने मन्त्री जुइपिनि नां ल्यइगु व शुक्रवाः हे सरकारं पूर्णता काइगु दाबी यानादिल । फोरमं प्यंगु मन्त्रालय प्यंगू राज्यमन्त्री व छम्ह सहायक मन्त्री दइगु सहमति जुइधुंकूगु दु ।
अथेहे थौं हे सरकारय् वनीपिं नेतातय् नां क्वछीत च्वंगु तमलोपाया बैठकं नां ल्यय्गु जिम्मा अध्यक्ष महन्थ ठाकुरयात ब्यूगु दु । पार्टी ज्याकूथी च्वंगु बैठकय् व्यापक सहलह जुसां मन्त्री जुइपिनि नां ल्यय् मफेवं थुकीया जिम्मा पार्टी अध्यक्ष ठाकुरयात ब्यूगु खः ।
गठबन्धन दलत नाप जूगु सहमति कथं तमलोपायात निगू मन्त्रालय व निगू राज्य मन्त्री बीगु सहमति जूगु खः ।
