समर्थन लित कायेगु सद्भावनाया ख्याच्वः
येँ / (सन्ध्या टाइम्स) एमाले व कांग्रेसं यकःति निर्णय यानाः सरकार चले याना वन धाःसा थःपिंसं बियातयागु समर्थन लित काये मालीगु ख्याच्वः सद्भावना पार्टीया नेता राजेन्द्र महतों बियादीगु दु ।
कांग्रेस व एमालें मन्त्रालय बाँडफाँड यायेगु निर्णययात भिंकूसा जक थःपिं नं सरकारय् वनेगु खँ वय्कलं कनादीगु दु ।
उखे सरकारय् सुयात सुयात मन्त्री दयेकेगु धइगु बारे मधेशी जनअधिकार फोरमय् नं थौं सहलह जुयाच्वंगु दु ।
फोरमय् शरदिसंह भण्डारी छम्हेसिया नामय् सहमति कायम जुइधुंकूगु दुसा मेपिं मन्त्रीतय् नामय् धाःसा सहमति कायम जुइ फयाच्वंगु मदु । फोरमपाखें कलावति पासवान सर्वदेव ओझापिनि नां चर्चाय् वयाच्वंगु दु ।
मन्त्रालय बाँडफाँडयात कयाः असन्तुष्ट जुयाच्वंपिं मधेशवादी दलतलिसे थौं प्रधानमन्त्री माधव नेपालं सहलह यानादीगु ज्याझ्वः दु ।
मू मू मन्त्रालय कांग्रेस व एमालें काःगु धासें मधेशवादी दलतय्सं असन्तुष्टि प्वंका वयाच्वंगु खः ।
