कांग्रेस संसदीय दलया बैठक
येँ / (सन्ध्या टाइम्स) नेपाली कांग्रेसया संसदीय दलया बैठक सिंहदरवारस्थित ज्याकुथी च्वनाच्वंगु दु । कंस शनिवाः जुइगु कांग्रेस संसदीय दलया नेता ल्ययेगु चुनावया निंतिं चुनाव सम्बन्धी ज्याझ्वः क्वःछीत उगु बैठक च्वंगु खः ।
संसदीय दलया नेता ल्यइगु चुनावया निंतिं वरिष्ठ नेता शेरबहादुर देउवा रामचन्द्र पौडेल व कुलबहादुर गुरुङिपंसं उम्मेदारी बीगु चर्चा जुयाच्वंगु दु । उखे कांग्रेसया बुद्धिजीवी गुटपाखें नरहरि आचार्य पुचलं धाःसा सर्वसम्मत रुपं सुप्रभा घिमिरेयात थनेगु कुतः यानाच्वंगु दु ।
कांग्रेसय् स्वम्हं नेतातय्सं उम्मेदवारी बीगु चर्चाया लिसें सर्वसम्मत निर्णय यायेगु निंतिं नं कार्यकर्तातय्सं दवाव बियाच्वंगु दु । चुनावया निंतिं भिडन्त मजुइमा धकाः थ्व पुचलं पार्टी सभापति गिरिजाप्रसाद कोइरालायात हे दलया नेता जुइत इनाप यानाच्वंगु खँ सीदुगु दु ।
