भिक्षु अश्वघोषया चय्स्वदँ बुन्हि
येँ / (सन्ध्या टाइम्स) धर्मचक्र बौद्ध अध्ययन गोष्ठीया ग्वसालय् धर्मकीर्ति विहारय् धम्मानुशासक भिक्षु अश्वघोष महास्थविरया चय्स्वदँ बुदिं तःजिक हन । धम्मवति गुरुमांया सभापतित्वय् भिक्षु अश्वघोष भन्तेया हनाय् उगु ज्याझ्वः जूगु खः ।
वंगु जेठ १६ गते शनिवाः भिक्षु अश्वघोषया ८३ दँ बुदिंया लसताय् धर्मकीर्ति बौद्ध अध्ययन गोष्ठीपाखें मचा किपा च्वज्या कासा नं याःगु खः । च्यादँनिसें झिंनिदँ तकया दथुइ 'लुम्बिनीइ सिद्धार्थ कुमारया जन्म' व झिंस्वदँनिसें झिंखुदँया दथुइ 'भगवान बुद्ध व देवदत्त' विषयय् उगु कासा जूगु खः । जेठ ३० गते बुदिंया मू ज्याझ्वलय् लिच्वः न्यंकेगु नापं सिरपाः इनेज्या जूगु खः ।
उत्तमो भन्ते किरण चित्रकार व राहुल तुलाधरिपं निर्णायक मण्डलय् च्वनादीगु उगु कासाय् अनागारिका महाश्रद्धा दिप्सन महर्जन व एमन शाक्य छसिकथं न्हाप लिउ व लियां लिउ लाःगु खः । मस्तय्गु पुचलय् सुशोभन शाक्य लिसा मानन्धर व अविप्सा तुलाधर न्हाप लिउ व लियां लिउ लाःगु खः । कासाय् ख्वीनिम्ह मस्तय्सं ब्वति काःगु खः । बुदिंया लसताय् भन्ते थम्हं हे च्वयाः पिथनादीगु 'धर्म उपदेश-२' नं धम्मावति गुरुमांपाखें विमोचन जुल ।
