नेपाः बाहेक विश्वन्यंकं भू-व्यवस्थापनय् न्हूगु प्रविधि
येँ / (सन्ध्या टाइम्स) विश्वया आपालं देशं भू-व्यवस्थापनय् सूचना प्रविधियात छ्यलाबुलाय् हःसां नेपालय् धाःसा अझं पुलांगु हे प्रविधिं पुलांगु हे पहः कथं भू-जाँच यायेगु ज्या जुयाच्वंगु खँ सबन्धित विज्ञतय्सं धाःगु दु ।
सार्क राष्ट्र श्रीलंकाय् देय्न्यंकं ल्याण्ड मार्क तयाः प्रत्येक जग्गाया नापी यायेगु ज्या जुयाच्वंगु दु । थुकिं यानाः सुयागु जग्गा छु गज्याःगु अवस्थाय् गन गथे दु धइगु अःपुक हे सीके फइगु खँ धाःगु दु । थुकिया निंतिं उमिसं आपालं सूचना प्रविधियात छ्यःगु खँ नापी अधिकृतं धाःगु दु ।
नेपालय् जग्गाधनी कथं दर्ता यायेगु चलन दु तर श्रीलंकाया लिसें मेमेगु देशया हकय् लाःगु ब्व दर्ता यायेगु चलन वयाच्वंगु खँ उम्ह अधिकृतं धाःगु दु ।
अथे हे एशियाली राष्ट्र इरानय् नं भू-व्यवस्थापनय् सूचना प्रविधियात छ्यलेधुंकूगु कारणं अन सुयागु जग्गा गन गुलि दु व गुकथं उकियात छ्यलाच्वन धइगु अःपुक हे सीके फयाच्वंगु दु । भारतया हे कर्नाटक राज्यय् नं ई-भूमि परियोजना कथं जग्गाधनी पूर्जा लगायत भू-सूचना बीगु ज्या जुइधुंकूगु दु ।
नेपालय् जग्गाया निंतिं भूमि नाप जाँच ऐन २०१९ लागू जूसां उकियात व्यवस्थित यायेत ३५ दँ लगे जूगु खः ।
विकास निर्माणया निंतिं गुगु जग्गा छु गज्याःगु अवस्थाय् दु धइगु खँ सीकेत व उकियात गुकथं छ्यलेगु धइगु खँयात कयाः सूचना प्रविधिपाखें पत्ता लगे यानाः दक्ष जनशक्ति उत्पादन यायेत काठमाडौं विश्व-विद्यालय नाप सहकार्य यानाः निदँ न्ह्यवंनिसें जियोम्याटिक्स इन्जिनियिरङ विषयस ब्वंकेगु ज्या जुयाच्वंगु दुसा आः तकया दुने पीच्याम्ह जनशक्ति तयार जुइधुंकूगु खँ धाःगु दु ।
