तराई आर्मीया दुजः ज्वन
येँ / (सन्ध्या टाइम्स) तराई आर्मिया केन्द्रीय दुजः मिस्टर राज धाइम्ह शैलेन्द्र गुप्तायात प्रहरीं ज्वंगु दु ।
म्हिगः रौतहटया स्थानीय व्यापारीतय्के चन्दा म्हयाच्वंगु इलय् प्रहरीं वयात ज्वंगु खः । प्रहरीं वयाके थ्री फिफ्टी पेस्तोल व उकिया गोली नं बरामद याःगु दु ।
ज्वंम्ह गुप्तायात येँय् थीथी थासय् बम मुइकेगु ज्याय् नं ल्हाः दुगु आशंकाय् प्रहरी 'मोस्ट वान्टेड' सूचीइ तयाः मालाच्वंम्ह खः । गुप्ताया बारे थप अनुसन्धान जुयाच्वंगु नं प्रहरीं धाःगु दु ।
उखे नवलपरासी थौं सुथय् गोलीं कयेकाः छम्हेसित स्याना बिउगु दु । नवलपरासीया हकुवा गाविसया तुटिया खुसी ताँ दयेकेगु ज्या यानाच्वंम्ह रुपन्देहीया राजेन्द्र पौडेलयात चान्हय् द्यनाच्वंगु इलय् थनाः न्हकुइ गोलीं कयेकाः स्याना बिउगु खः ।
राजेन्द्रयात छाय् स्यात धइगु खँ सी मदुनिसा हत्याया जिम्मा सुनां नं काःगु मदुनि ।
