तस्कर व सुरक्षाकर्मी दथुइ गोलीं कयेकाः ल्वापु
येँ / (सन्ध्या टाइम्स) बर्दिया राष्ट्रिय निकुञ्जय् सेना व वन्यजन्तु तस्करतय् दथुइ वंगु चान्हय् गोलीं कयेकाः ल्वापु जूगु दु । उगु ल्वापुइ लानाः गुगुं नं कथंया मानवीय क्षति मजूगु खँ धाःगु दु ।
ल्वापु लिपा तस्करत बिसिउँ वंगु खःसा छम्हेसित धाःसा सेनां ज्वनेत ताः लाःगु दु । सेनां बलबहादुर नकालयात चाइनीज पेस्तोल उकिया गोली लिसें न्हय्पु भरुवा बन्दुक नं बरामद याःगु दु । नकालयात कयाः अनुसन्धान जुयाच्वंगु दुसा मेपिं बिसिउँ वंपिंत नं मालेगु ज्या जुयाच्वंगु दु ।
बर्दिया राष्ट्रिय निकुञ्जय् गैडायात स्यानाः उकिया खाग लिकाना यंकेगु ज्या अप्वया वनाच्वंगुलिं अन सेना हे तयाः तस्कर नियन्त्रण यायेगु कुतः जुयाच्वंगु खःसां नं ताः धाःसा लाये फयाच्वंगु मदु ।
