मिलिजुली संस्कारया अभाव
देशय् तःगूमछि मिलिजुली सरकारत वयेधुंकूसां राजनीतिक पार्टीतय्के मिलिजुली सरकारय् च्वनाः ज्या यायेगु संस्कार धाःसा अझं विकास मजूनिगु खँ हानं छक्वः पुष्टि जूगु दु । प्रधानमन्त्री माधव नेपालं म्हिगः मन्त्रिमण्डलयात पूर्णता बीगु धकाः सम्पूर्ण तयारी यायेधुंकाः नं अन्तिमय् वयाः मधेशवादी पार्टीत समावेश जू मवल । उमिगु द्वपं दु एमाले व कांग्रेसं कोलिशन संस्कारयात वास्ता मयासे न्ह्यागु खँ नं थःथःपिं जक च्वनाः निर्णय यानाच्वंगु दु गुगु मधेशी नेतातय्त पचे जुयाच्वंगु मदु । वास्तवय् उमिगु तर्क नाजायज मखु । धायेत थ्व सरकारयात २० दलया मंकाः सरकार धयाच्वंगु दु तर निर्णय धाःसा एमाले व कांग्रेस निगू पार्टी जक जानाः यानाच्वंगु दु । बाँकी पार्टीया भूमिका सरकारं न्ह्यागु याःसां उकियात समर्थन यायेगु बाहेक मेगु जुइ फयाच्वंगु मदु । छगू निगू जक सीट दुपिं पार्टीतय्सं थुकियात सहज रुपं काःसां फोरम तमलोपा व सद्भावना पार्टीया मंकाः पुचः गुकिया सम्पूर्ण सीट संख्याः करिब सछि हे धइथें दु उमिसं थुकियात स्वीकार याइगु खँ मदु । एमाले व कांग्रेसं आः जक मखु न्हापांनिसें हे थज्याःगु व्यवहार याना वयाच्वंगु खः । न्हापा न्हय्गू दलया गठबन्धन दुगु इलय् नं केवल स्वंगू दल जक च्वनाः फुक्क खँया निर्णय याइगु धकाः मेगु दलतय्सं असन्तोष प्वंकीगु खः । तःधंगु धाःगु पार्टीतय्के अज्याःगु संस्कार अझ नं कायम हे दनि गुकिया मार उमिसं आः वयाः नये मालाच्वंगु दु । अज्याःगु संस्कार मदुगु कारणं यानाः हे थौं माधव नेपालया सरकारं पूर्णता काये मफयाच्वंगु खः । थ्व संस्कार आः छक्वः जक मखु सरकार टिके यायेगु खःसा अन्तिम तकं कायम याना तयेमाःगु खनेदु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
