क्याम्पस प्रमुखयात दाःपिं विद्यार्थीत रिहा
क्याम्पस प्रमुखयात दाःपिं स्वम्ह विद्यार्थीत बिहिवाः प्रहरी हिरासतं रिहा जूगु दु । जिल्ला अदालत सप्तरीया न्यायाधीश रमेश पोखरेलया ईजलाशं कुनातःपिं विद्यार्थीतय्त रिहा यायेत आदेश ब्यूगु खः ।
महेन्द्र विन्देश्वरी क्यामपस सप्तरीया प्रमुश देविदत्त साहयात कोठय् कुनाः दाःपिं स्ववियु सभापति रामचन्द्र यादव, प्रकाश यादव व सन्तोष यादवयात प्रहरीं अपहरण बन्धक देयेकूगु व दाःगुया मुद्दा दायर यानाः कुनातःगु खः । विद्यार्थीतय्त त्वते धुंकाः अन विजय जुलुस पिहांवःगु खः ।
थ्वस्वयां न्ह्य: क्याम्पस प्रमुखयात दा:पिंत प्रहरीं ज्वंगु विरोधय् झिगू दल सम्बन्धित प्रतिनिधितय्सं जिल्ला प्रशासन ज्याकू सप्तरीइ तालाबन्दी यायेत स्व:गु ईलय् प्रहरीं लाठीचार्ज याःगु दु । प्रहरीया लाठीचार्जय् लानाः न्याम्ह राजनीतिक कार्यकतात घाःपाः जूगु ख: ।
ज्वनायंकूपिंत बिना सर्त त्वतेमाःगु माग यासें सत्तारुद्ध एमाले, फोरम लगायत दलतय्सं जिल्ला प्रशासन ज्याकूथी तालाबन्दी यायेत्यंगु ईलय् प्रहरीं हस्तक्षेप याःगु खः । प्रहरीया लाठीचार्जय् लानाः मधुसुदन यादव, केदार देव, सुखाराम यादव, दयानन्द देव व शम्भु यादव घाःपाः जूगु दु ।
