टेण्डर बदर यायेत माग यासें चितवन बन्द
चितवनया भरतपुरय् च्वंगु केन्द्रीय बस टर्मिनल संचालनया जिम्मा थःपिंत बीमाःगु माग यासें राष्ट्रिय यातायात व्यवसायी महासंघं बिहिवाः चितवन जिल्ल बन्द याःगु दु ।
महासंघया नारायणी अञ्चल समितिं याःगु जिल्ल बन्दया प्रभाव सुथनिसें लाःगु दुसाः यायतायात व्यवसायीतय्सं नारायणगढया पुल्चोक व आंपटारीइ प्रदर्शन यानाच्वंगु दु । बन्दया कारणं बजाः, शिक्षण संस्था, कलकारखाना आदि दक्वं ठप्प जूगु दुसाः पूर्व-पश्चिम राजमार्गं वःगु सवारीसाधणत नाकाय् अलपत्र जूगु दु ।
भरतपुर नगरपालिकां लच्छि न्ह्यः निसें आव्हान याःगु टेण्डरयात प्रभावित यायोत व्यवसायीतय्सं निन्हु न्ह्य निसें चरणबद्ध आन्दोलन न्ह्याकूगु खः । महासंघं थौं नं निसें स्वन्हु तक जिल्ला बन्द यायेगु व मेगू निन्हु नारायणी अञ्चल बन्दया आव्हान याःगु दु ।
थ्वहे दथुइ नेपाल पीछडा वर्ग (ओबिसी) महासंघं याःगु तराई बन्दया कारणं थौं स्वन्हुया न्हि नं सुनसरी लगायत मध्य तराईया जनजीवन प्रभावित जूगु दु । बन्दया कारणं पूर्व-पश्चिम राजमार्गया इनरुवा खण्डय् सवारी साधण संचालन जुइफूगु मदुसाः सुनसरी सदरमुकाम इनरुवाया बजाः नं बन्द जुगु दु । पीछडा वर्गं थीथी माग तयाः असार २ गते निसें बन्दया आव्हान याःगु खः ।
