सरकार दयेकेत भारतीय कर्मचारी

आखिर प्रधानमन्त्री माधव नेपालया सरकारयात पूर्णता बीकेगु लागिं नं भारतं हे भूमिका म्हितेमाःगु जुया बिउगु दु । वंगु स्ववाः न्ह्यवंनिसें पूर्णता बी मफयाः दथुइ थानाच्वंगु प्रधानमन्त्री माधव नेपालया सरकारयात पूर्णता बीकेगु लागिं भारतं थःपिनि छम्ह कर्मचारीयात नेपाः छ्वया हयेत्यंगु दु । नेपाःया सुं हे नेतां यानां नं जुइ मफयाच्वंगु उगु ज्या सम्पन्न यायेत भारतं थःपिनि विदेश सचिव शिवशंकर मेननयात खटे यायेत्यंगु खः । झीत पूर्ण विश्वास दु नेपाःया सुं नं नेतां धयां नं मजुयाच्वंगु थ्व सरकारयात पूर्णता बीगु ज्या भारतीय सरकारया उम्ह दूतं बांलाक हे मिले याना थकी । नेपाःया छगू दलया नेतां धाःगु खँयात मेगु दलं माने मयाःसां भारतीय सरकारया छम्ह कर्मचारीं धाःगु खँयात धाःसा सहज रुपं हे माने याइ । थुकी झी ढुक्क हे जूसां जिउ । नेपाः सरकारया उपप्रधानमन्त्री समेत जुइधुंकूम्ह एमाले नेता खड्गप्रसाद ओली थौंकन्हय् वासः यायेगु त्वहचिनाः न्हूदिल्लीइ हे दुसा अन वय्कलं थःगु पदीय मर्यादायात समेत वास्ता मयासे भारतीय सरकारया कर्मचारीयात नापलाः वनाच्वंगु दु । वय्कः वास्तवय् भारतय् वासः याः वंगु मखुसें भारत सरकारयात नेपाः बारे आवधिक रिपोर्ट बुझे यायेत जक वनाच्वंगु लानाच्वन । वर्तमान सरकार भारतया हे ग्रायण्ड डिजायन कथं दयेकूगु धइगु द्वपं वयाच्वंगु इलय् नेपाःया नेतात भारतय् वनाः थुकथंया गतिविधि याः वनीबलय् अज्याःगु द्वपंयात पुष्टि यायेगु ज्या जक याइ । थौं जाबा सरकार छगू गठन यायेगु ज्याय् तकं भारतं वयाः हस्तक्षेप यायेमाःगु अवस्था दुसा नेपाःया नेतातय्सं आः देय्या गौरव ल्यंकी व सार्वभौमिकताया रक्षा याइ धकाः विश्वास मयाःसां जिल ।

More Stories Like this