मन्त्रिपरिषद विस्तार, पूर्णता अझ कायेमफुत

प्रधानमन्त्री माधवकुमार नेपालं थौं स्वक्वःगु खुशी मन्त्रिपरिषद विस्तार यानादीगु दु । थौंया मन्त्रिपरिषद विस्तारय् न्याम्ह मन्त्री व खुम्ह राज्य मन्त्री थपे याःगु दुसां स्वक्वःगु खुशी विस्तायर जूगु मन्त्रिपरिषदय् नं एमाले व कांग्रेसया नेतात बाहेक मधेशवादी दलतय्त धासाः सरकारय् दुथ्याके मफुत ।

बुधवाः प्रधानमन्त्री नेपालं राष्ट्रपतिया ज्याकूथी न्हुपिं मन्त्रीतय्त शपथ ग्रहण याकादीगु दु । राष्ट्रपति डा. रामवरण यादवया उपस्थिति प्रधानमन्त्री नेपालं एमाले पाखें मन्त्री जुपिं शंकर पाखरेल, भीम रावल, रकम चेम्जोङ, प्रभाकर प्रधानाङ्ग (रविन्द्र श्रेष्ठ) व कांग्रेस पाखें मन्त्री जुम्ह आफ्ताब आलमयात शपथ ग्रहण याकादीगु खः ।

अथेहे थौं हे कांग्रेसया स्वम्ह व एमालेया स्वम्ह राज्यमन्त्रीतय्सं सिंहदरवारय् शपथ ग्रहण याःगु दु । राज्यमन्त्रीलय् कांग्रेस पाखें गणेशबहादुर खड्का, चन्द्रसिंह भट्टराई, खड्गबहादुर बस्याल व एमाले पाखें जितु गौतक (दर्जी), रिजवान अन्सारी व डिल्लीबहादुर महत नियुक्त जुयादीगु दु ।


थौंया मन्त्रिपरिषद विस्तार नापं मन्त्रितय् ल्या नीनिम्ह थ्यंगु दु । मन्त्रिपरिषदय् फोरमया उपप्रधानमन्त्री, एमालेया खुम्ह मन्त्री, स्वम्ह राज्यमन्त्री, कांग्रेसया न्ह्यम्ह मन्त्री व स्वम्ह राज्यमन्त्री, नेकपा (माले)या छम्ह मन्त्री दुथ्या:गु दु ।

बुधवा: विस्तारित मन्त्रिपरिषदय् एमालेया शंकर पोखरेलयात सूचना तथा सञ्चार, भिम रावलयात गृह, प्रभाकर प्रधानाङ्ग (रविन्द्र श्रेष्ठ)यात सामान्य प्रशासन व रकम चेम्जोङयात शान्ति तथा पुर्ननिर्माण मन्त्रीया पद ब्यूगु दु । अथेहे डिल्ली महतयात ‍शान्ति तथा पुर्ननिर्माण, जितु गौतम(दर्जी)यात सामान्य प्रशासन व रिजवान अन्सारीयात गृह राज्यमन्त्रीया जिम्मेवारी ब्यूगु दु ।

नेपाली कांग्रेसया प्रकाशशरण महतयात उर्जा, बालकृष्ण खाँडयात‍ सिचाई, पूर्ण कुमार शेर्मायात स्थानिय विकास, मिनेन्द्र रिजालयात संघीय मामिला, संविधानसभा तथा संसदीय व्यवस्था, मोहम्मद अफ्ताव आलमयात श्रम तथा यातायात व्यवस्था मन्त्रालयया जिम्मेवारी ब्यूगु दु । अथेहे गणेश बहादुर खड्कायात स्थानीय विकास, चन्द्रसिंह भट्टराईयात उर्जा व खड्गबहादुर बस्यालयात स्वास्थ्य राज्यमन्त्रीया कथं नियुक्त या:गु दु । नेकपा (माले)या डम्बर श्रेष्ठयात भूमिसुधार तथा व्यवस्था मन्त्रीया जिम्मेवारी ब्यूगु दु ।

मधेशवादी दलत नाप जूगु असमझदारीयात सत्ता साझेदार न्यागू दलया बैठकं हल यासां तराई मधेश लोकतान्त्रिक पार्टी व सद्भावनां आन्तरिक तयारी यायेमाःगु धायेवं थौं नं मधेशवादी दलतय्त मन्त्रिपरिषदय् दुथ्याके मफुगु खः ।