सांस्कृतिक तथा सामाजिक ऐक्यवद्धताया आधार निर्धारण
सांस्कृतिक तथा सामाजिक ऐक्यवद्धताया आधार निर्धारण समितिं थौं मस्यौदा तथा अबधारणायात लिपांगु रुप ब्यूगु दु ।
थौं सुथय् च्वंगु समितीया बैठकय् मस्यौदा तथा अवधारणायात बहुमतं पारित याःगु खः । भाषा व जनयुद्ध शब्दय् विवाद दुगु कारण एकिकृत नेकपा (माओवादी)या झिंखुम्ह सभासदं धाःसा फरक मत न्ह्यब्वसें ल्हाःचिं तःगु मदु । माओवादीं सशस्त्र युद्धया पलेसा जनयुद्ध शब्द तयेमाःगु व छु नं छगू भाय्यात संघिय, प्रादेशिक व अदालती भाय् धकाः न्ह्यथने मज्यूगु अडान कया फरक मत तःगु खः । माओवादीं नेपालय् दुगु गुइनीगू भाय् मध्ये छगू प्रतिशत स्वयां अप्वसिनं न्वंवाइगु भाय् झिंछगू दुगुलिं छगूयात जक कामकाजी दयेके मज्यूगु व बहुभाषिक नीति अन्तरगत च्वनाः भाय्या व्यवस्था यायेमाःगु बिचाः तःगु ख: ।
मधेसी दलया सभासदतय्सं धाःसा हिन्दी भाय् यात कामकाजी भाय्या कथं छ्यले माःगु व नेपाली भाय्यात खस भाय् धायेमाःगु धारणा तःगु दु । समितिं लिपांगु रुप ब्यूगु मस्यौदास आः च्वनीगु संविधानसभाया बैठकय् सहलह जुइगु जूगु दु ।
