संसदीय दलया नेताया निर्वाचनय् थः त्याइगु दाबी : गुरुङ
नेपाली कांग्रेसया महामन्त्री कुलबहादुर गुरुङं संसदीय दलया नेताया निर्वाचनय् थः त्याइगु दाबी यानादीगु दु ।
थौं रिपोर्टस्र क्लब नेपालया साक्षात्कारय् न्वंवासें गुरुङं थःगु पक्षय् आपालं सभासदया समर्थन दुगुलिं चुनाव त्याइगु दाबी यानादीगु खः । 'नेपाली कांग्रेसया संसदीय दलया नेताया निंतिं शनिवाः जुइगु चुनाव ल्वानाः त्याके' गुरुङं सम्भावित प्रतिस्पर्धीतय्त इनाप यासें धयादिल 'शेरबहादुर देउवा प्रस्तावक व रामचन्द्र पौडेल समर्थक जुयाः जितः सर्वसम्मत दयेकादिसं ।'
थः सुयाके नं न्यना उम्मेदवार जुइत्यनागु मखु, कार्यकर्ताया भावना व चाहनाकथं न्ह्यःने न्ह्यायेत्यनागु वय्कःया दाबी खः । वय्कलं सभापति गिरिजाप्रसाद कोइरालाया समर्थन दयेमाः धइगु मनंतुनागु तर मदुसां लिमचीलेगु स्पष्ट यानादिल । वयेकलं सहमतिया निंतिं कोइरालां माःगु पला: ल्हवनेमा:गु बीचा: प्वंकादिल ।
