युथफोस्रं कर्मचारीतय्त आक्रमण
सरकारया नेतृत्व यानाच्वंगु व मालदार मन्त्रालय समेत थःगु भागय् लाकूगु नेकपा (एमाले)या कार्यकर्ता धाःसा चन्दा फ्वना जुइगु ज्या त्वःतूगु मदुनिसा: चन्दा मब्यूपिंत आक्रमण यायेगु ज्या नं त्वःतूगु मदुनि ।
थ्वहे झ्वलय् थौं एमालेया युवा दस्ता युथफॊस्रया कार्यकर्तां चन्दा मब्यूगु तं क्यनाः रौतहटया जिल्ला विकास समितीया कर्मचारीदथुइ आक्रमण याःगु दु । युथफोस्र रौतहट जिल्ला नेता प्रविण पाण्डेया नेतृत्वय् वंगु युथफोस्रया कार्यकर्तातय्सं रौतहट जिविस ज्याकुथिइ दुहाँ वनाः स्थानीय विकास अधिकारी रामआशिष दास सहितया कर्मचारीतय्त आक्रमण याःगु दु । युथफोस्रया आक्रमणपाखें स्थानीय विकास अधिकारी दास लगायत लेखा अधिकृत देवनारायण चौधरी व मेपिं निम्ह कर्मचारी घाःपाः जूगु दु । घाःपाः जूपिं कर्मचारीतय् गौर अस्पतालय् वासः जुयाच्वंगु दु ।
आक्रमण याम्ह युथफोस्रया कार्यकर्तात प्रविण पाण्डे, निशान्त शर्मा, विक्रम यादव व आशुतोष सिंह मध्ये सिंहयात प्रहरीं ज्वंगु जिमि ग्वाहालिमि अनिल निरालां जानकारी ब्यूगु दु । युथफोस्रं कर्मचारीतय्त आक्रमण यायेवं जिल्ला विकास समिती रौतहट बन्द जूगु दु ।
