राष्ट्रपतिया पला:यात प्रधानमन्त्रीया समर्थन
राष्ट्रपतिया पला: यात समर्थन यासें गठवन्धन सरकारया नेतृत्व यानाच्वंगु एमाले दुने खनेदुगु विवाद संसदीय दलय् नं खनेदुगु दु ।
बहुमतया आधारय् केपी ओली समुहया दवावय् राष्ट्रपतिया कदमयात जायज धासें केन्द्रीय समितिं न्हूगु सरकारया नेतृत्व यायेगु निर्णय याःगु जूसां नं एमाले संसदीय दलं नेतृत्वया आलोचना याःगु दु । तर सभासद्तय्सं ल्ह्वंगु विषयलय् लिसः ब्यूसें प्रधानमन्त्री माधव कुमार नेपालं थःम्हं राष्ट्रपतिया कदमयात असंवैधानिक धायेमफइगु खँय् जिद्दी यानादीगु दु । थौं संसदीय दलया ज्याकु सिंहदरवारय् च्वंगु वैठकय् सभासदतय्सं राष्ट्रपतिया पला: असंवैधानिक जूगु धारणा तःगु दु ।
अथेहे उमिसं संविधानसभाया चुनावय् बूपिंनिगु सरकारया नेतृत्वनिसें मन्त्री तक जूगु धासें विरोध याःगु दु । थ्वहे झ्वलय् पीन्याम्ह दुजः दुगु मन्त्रीमण्डल दयेकेत न्ह्यज्याम्ह प्रधानमन्त्री माधव कुमार नेपालं अझ तःधंगु मन्त्रीमण्डल दयेकेत दवाव वःगु खँ धायादीगु दु । प्रधानमन्त्री नेपालं फुक्क पार्टीया चित्त बुझय् यायेत व सरकार टिकय् यायेत मन्त्रीमण्डलया आकार अझ तःधंगु दयेकेत दवाव वःगु धयादीगु खः ।
अथेहे प्रधानमन्त्रीं माओवादी सरकारं कायममुकायम प्रधानसेनापति नियुक्त याःम्ह रथी कुल बहादुर खड्कायात कारबाही मयायेगु स्पष्ट यानादीगु दु । वय्कलं खड्कायात सम्मानजनक पद व हैसियत बिइगु विषयसं गृहकार्य जुयाच्वंगु जानकारी बियादीगु दु ।
संसदीय दलया बैठकय् सभासद्तय्सं जम्बो मन्त्री मण्डल दयेकेत स्वःगु धासें प्रधानमन्त्रीया आपालं आलोचना याःगु खः । उमिसं बूपिंत मन्त्री दयेकाः माधव नेपालं बेरोजगारयात रोजगारी ब्यूगु टिप्पणी याःगु दु । उमिसं पार्टीं काःगु लँपूया समिक्षा यायेत माग याःगु दु । अथेहे सभासदतय्सं माओवादी लिसेया स्वापूया विषयस नं प्रष्ट जुइत माग याःगु खँ एमाले सचेतक भीम आचार्यं जानकारी बियादिल । उमिसं बुटवलय् क्वचाःगु च्याक्वःगु महाधिवेशनलिपा थःपिनिगु पार्टी मोर्चाय् परिणत जूगु द्वपं समेत ब्यूगु दु । दलया बैठक शुक्रबाः सुथय् हाकनं च्वनीगु जूगु दु ।
