ख्वप कलेज दुर्ब्यसनीया अखडा
ख्वप (सन्ध्या टाइम्स) / ख्वपया छगूयां छगू जक इन्जिनियरिङ कलेज आः दुर्ब्यसनी विद्यार्थीतय् अखडा जुयाच्वंगु दु । उकिं यानाः लिवाली लागाया मनूत अन्यौलय् लानाच्वंगु दु ।
कलेजया विद्यार्थीत स्थानीय किसानतय् बुँइ वनाः तरकारी खुया नया जुइ । कलेजया लँ जुयाः जुइपिं ल्यासेतय्त अपशब्द छ्यलाः हायेका च्वनी । लँय् सुयागुं मोबाइल वा क्यामेरा खन धाःसा लुटे याइ । थज्याःगु ज्याया नाइके अशोक सिंह बस्नेतयात कलेजं कारबाही याये फुगु मदु । दुर्ब्यसनी विद्यार्थीत कक्षा क्वथा दुने हे मिनरल वाटर बोटलय् जायेकातःगु अय्लाः त्वनाः लठ्ठ जुइ ।
कलेजया प्रिन्सिपल पुस्कर सुवालयात स्थानीयबासीतय्सं थुगु खँया बारे जानकारी बिलं नं कलेज प्रशासन धाःसा मौन जुयाच्वंगु दु । उलि जक मखु सुवालं थःथाय् वयाः थुकथंया जानकारी बिउ वइपिं मनूतय्त नापं अःखबतं लाक्व म्हुतु ल्हायेगु यानाच्वंगु खँ नं स्थानीय मनूतय्सं धाःगु दु ।
थुकिं यानाः ख्वप इन्जिनियरिङ कलेजं इन्जिनियर सिबें अप्वः दुव्र्यसनी उत्पादन याइगु खँ धयाहःगु दु ।
रविन राचलिकापाखें
