आः व्यक्तिगत प्यान कायेमाःगु व्यवस्था
यें (सन्ध्या टाइम्स) / सरकारं करय् न्हूगू व्यवस्था लागू यायेत्यंगु दु । करया लागा तब्या यायेगु ल्याखं आः व्यक्तिगत रुपं नं स्थायी लेखा नम्बर कायेमाःगु व्यवस्था यायेत्यंगु दुसा अप्वः आम्दानी दुपिंसं अनिवार्य रुपं कर पुलेमाःगु व्यवस्था नं सरकारं यायेत्यंगु दु ।
थुकिया निंतिं आन्तरिक राजस्व कार्यालयं व्यक्तिगत रुपं सकलें प्यानय् दर्ता जुइमाःगु व्यवस्था वइगु वजेटय् यायेत्यंगु दु । उगु व्यवस्था कथं छेँय् बालं तईपं शेयर बैंक वित्तीय संस्थाय् लगानी यानातःपिं नापं वकिल डाक्टर प्राध्यापक शिक्षक पत्रकार इन्जिनियर थेंजाःगु व्यवसायिक पेशाय् संलग्न जुयाच्वंपिं नं प्यानय् दर्ता जुइमाःगु जूगु दु ।
थुगु व्यवस्थायात अझ प्रभावकारी यायेत पेशाकर्मितय्सं थःगु प्रमाणपत्र नवीकरण यायेगु इलय् प्यानय् दर्ता जुयाच्वंगु विवरण नं पेश यायमाःगु जुइ । थौंकन्हय् ३ लाख ३० हजारं कर पुलाच्वंगु दुसा निदँया दुने २ लाख थप यायेगु योजना दु । छुं दिं न्ह्यः आयया स्वयं कर घोषणाय् सहभागी जूपिं सकसितं नं प्यानय् दर्ता याइगु जूगु दु ।
