सशस्त्र द्वन्द्वया इलय् ध्वस्त जूगु विमानस्थलया पुनःनिर्माण
यें (सन्ध्या टाइम्स) / नेकपा माओवादीं सशस्त्र द्वन्दया इलय् ध्वस्त याःगु नेपाःया थीथी थासय् च्वंगु झिगू विमानस्थलया पुनःनिर्माणया ज्या शुरु जुइत्यंगु दु । माओवादीं द्वन्दकालय् विमानस्थलया धावनमार्ग बाहेकं दक्वं भौतिक संरचनात ध्वस्त याःगु
खः ।
माओवादीपाखें सशस्त्र द्वन्दया इलय् ध्वस्त याःगु विमानस्थलत मध्ये रुकुम डोल्पा खोटाङ भोजपुर फाप्लु संखुवासभा बझांङ व ताप्लेजुङया विमानस्थलत पुनःनिर्माण यायेत्यंगु खः । उकी मध्ये रुकुम व खोटाङय् निगू निगू विमानस्थलत
दु । ध्वस्त जूगु विमानस्थल पुनःनिर्माणया निंतिं टेण्डरपाखें याये माःगु सकतां ज्या पूवनेधुंकूगु खँ नागरिक उडड्यन प्राधिकरणं धाःगु दु ।
उगु विमानस्थलया एअर ट्राफिक कन्ट्रोल टावर आवास गृह सुरक्षा गार्ड गृहया पुनःनिर्माण यायेत्यंगु खः । सरकारं विमानस्थल पुनःनिर्माण यायेत आ.व. ०६३/६४ लय् १ करोड ४७ लाख व ०६४/६५ लय् ८ करोड ९४ लाखया वजेट निकासा याःगु खःसा थुगु दँय् ४ करोड माग याःगु दु ।
नागरिक उडड्यन प्राधिकरणं द्वन्दया इलय् ध्वस्त जूगु नेपाःया झिंप्यंगू विमानस्थलया क्षतिया विवरण मुंकाः प्यदँ नह्यः हे सरकारयात वजेट निकासाया निंतिं इनाप याःगु खः ।
देय्नयंकं न्यय्प्यंगू विमानस्थल दुगुली थौंकन्हय् स्वीन्हय्गू विमानस्थल क संचालनय् वयाच्वंगु दु । उकी मध्यय् टीकापुर दार्चुला रोल्पा महेन्द्रनगर जिरी स्याङबोचे बैतडी ढोरपाटन बलेवा व पालुङटारया विमानस्थालत सतक सुविधा दयेवं बन्द जूगु खँ नागरिक उडड्यन प्राधिकरणं धाःगु दु ।
