सरकारय् ४९ म्ह मन्त्री दइगु सम्भावना
यें (सन्ध्या टाइम्स) / प्रधानमन्त्री माधव नेपालं थौं ४० सदस्यीय मन्त्रिमण्डल गठन यायेगु धकाः तयारी यानाच्वंसां सपथ ग्रहण यायेगु इलय् तक थ्यनीबलय् थ्व ल्याः ४५ पुलीगु अनुमान दु । अथे खःसां थौं राष्ट्रपति भवनय् धाःसा मन्त्रीतय् लागिं फुक्कं यानाः ४९ गः गाडी तयार याना ति धकाः गृह मन्त्रालय-यात निर्देशन वनाच्वंगु खँ सीदुगु दु ।
मन्त्रीतय् ल्याः थथे न्हिंन्हिं हे थपे याना यंकेमाःगु खँय् प्रम नेपाल धाःसा सन्तुष्ट मदुगु खँ धाःगु दु । म्हिगः छगू ज्याझ्वलय् न्ववासें वय्कलं थथे हे मन्त्रीत थपे यानाच्वनेमालीगु खःसा थम्हं हे राजीनामा बीमाली ख्वाः वः धकाः तकं न्ववानादीगु खः ।
मन्त्री जुइपिनि ल्याः अप्वया वनाः थीथी मन्त्रालयत तछ्यानाः निगू निगू दयेकेगु ज्या समेत जूगु खः । सूत्रया कथं म्हिगः च्वंगु पार्टीतय् बैठकय् मुक्कं १ अर्ब ति जक बजेट दुगु व सुं हे सभासद् मन्त्री जुइत तयार मजुइगु वातावरण तथा विज्ञान प्रविधि मन्त्रालय तकं निकू कुचा यानाः वातावरण व विज्ञान प्रविधि यानाः निगू मन्त्रालय दयेकेगु प्रस्ताव समेत वःगु खः ।
मन्त्रीया लागिं जुयाच्वंगु बार्गेनिंगया झ्वलय् मधेशी पार्टीत धाःसा अप्वः लबः कायेत ताःलाःगु दु । तमलोपा फोरम व सद्भावना स्वंगू पार्टीयात आः च्यागू मन्त्रालय समेत राज्य व सहायक यानाः १६ म्ह मन्त्री दइगु जूगु दु ।
जम्बो मन्त्रिमण्डल ज्वनाः प्रम नेपालं थौं सपथ ग्रहणया तयारी यानाच्वंगुलिं राष्ट्रपति भवनय् नं सपथग्रहणया तयारी जुयाच्वंगु खँ सीदुगुदु ।
