दिल्लीइ ओलीया राजनीतिक यात्रा
यें (सन्ध्या टाइम्स) / स्वास्थ्यलाभ यायेगु त्वहचिनाः भारतया न्हूदिल्ली वनाच्वंम्ह एमाले नेता केपी ओलीं अन थ्यंकाः धाःसा थःगु दिल्ली यात्रायात पूरा हे राजनीतिक भ्रमण दयेकादीगु दु ।
न्हूदिल्लीइ वय्कलं म्हिगः विदेश मन्त्रीयात नापलानादीगु खःसा बहनी पुलांम्ह विदेशमन्त्री व आःयाम्ह अर्थमन्त्री प्रणव मुखर्जीयात नं नापलानादीगु खः । अथे हे म्हिगः बहनी वय्कलं प्रमुख प्रतिपक्षी नेता लालकृष्ण आडवाणीयात नं नापलानाः खँल्हाबल्हा यानादीगु खः ।
स्वास्थ्यलाभ यायेगु धकाः भारत वनाः लिपा राजनीतिक मनूत नापलाःगु बारे म्हिगः बहनी बीबीसी नेपाली सेनां वय्कःयाके न्यंगु न्ह्यसःया लिसः बिसें वय्कलं भारतया आपालं नेतातलिसे थःगु व्यक्तिगत म्हसीका नं दुगुलिं उपिंलिसे खँल्हाबल्हा जूगु व उमिसं नेपाःया वर्तमान अवस्था बारे थःपाखें सीकेत चाहे जूगु खँ कनादिल । भारतीय नेतातय्सं माओवादीत जनयुद्ध त्वःताः इमान्दारितापूर्वक मूलधारया राजनीतिइ वःगु जकं मखु ला धकाः न्ह्यसः तःगु जानकारी नं बियादिल ।
