देउवा, पौडेल व गुरुङ उम्मेदवार
नेपाली कांग्रेसया संसदीय दलया नेताया निंतिं पार्टीया स्वम्ह वरिष्ठ नेतात दथुइ प्रतिस्प्रर्धा जुइगु जूगु दु । संसदीय दलया नेताया निंतिं कांग्रेस वरिष्ठ नेता शेरबहादुर देउवा, उपसभापति रामचन्द्र पौडेल व महामन्त्री कुलबहादुर गुरुङ दथुइ प्रतिस्प्रर्धा जुइगु जूगु दु । ताः ई न्ह्यः निसेः संसदीय दलया नेता विहीन जुयाच्वंगु कांग्रेसया संसदीय दलया निर्वाचन थ्वहे शनिवाः जुइत्यंगु दु ।
कांग्रेसया वरिष्ठ नेता शेरबहादुर देउवा व उपसभापति रामचन्द्र पौडेलं उम्मेदवारी बीगू स्वरुप तयारी लगेजुयाच्वंगु दुसाः महामन्त्री कुलबहादुर गुरुङं शनिवाः जुइगु संसदीय दलया निर्वाचनय् नेताया निंतिं उम्मेदवारी बीगु खँ धाःगु दु ।
थौं येँय् रिपोर्टस क्लबय् जूगु पत्रकार सम्मेलनय् महामन्त्री गुरुङं उम्मेदवारी बीगु खँ धयादीगु खः । वयेकलं थः निर्विरोध जुइगु सम्भावना मदुसां पार्टी सभापति उम्मेदवारी मबीगु पक्का जूगुलिं बहुमत दुजःत थःगु पक्षय् दुगु दाबी यानादिल । वयेकलं सभापति व उपसभापति तटस्थ च्वनाः अविभावकया भूमिकाः निर्वाह यायेमाःगु बीचाः प्वंकादिल ।
उपसभापति रामचन्द्र पौडेलं मंगलवाः पत्रकार सम्मेलन यानाः थम्हं उम्मेदवारी बीगु घोषणा याये धुंकूगु दुसाः वरिष्ठ नेता देउवां रुपं थम्हं उम्मेदवारी बीगु खँ सार्वजनिक मयानिसां पार्टी दुने धासाः व्यापक अभियान न्ह्याके धुंकूगु दु ।
