दलत दथुइ कन्हय् सहमति जुइगु सम्भावना
सरकारय् मन्त्रालय भागबन्डाया खँय् सत्ता साझेदार न्यागू दलत दथुइ कन्हय् सहमति जुइगु सम्भावना अप्वःगु दु । मन्त्रालय भागबन्दाया विषयस मंगलवाः च्वंगु न्यागू दलया बैठक सहमति नापसं थ्यना क्वचायेवं थ्व सम्भावना अप्वःगु खः ।
सत्ता नेतृत्व यानाच्वंगु नेकपा (एमाले), प्रमुख सत्ता साझेदार नेपाली कांग्रेस, मधेशी जनअधिकार फोरम (गच्छदार पक्ष), तराई-मधेश लोकतान्त्रिक पार्टी व सद्भावना पार्टी दथुइ थौं जूगु बैठकय् छुं सहमति जुइमफुसां थौंया बैठक सकारात्मक जूगु खँ बैठकय् ब्वति कापिं नेतातय्सं धाःगु दु ।
बैठक लिपाः उपप्रधानमन्त्री व फोरम नेता विजयकुमार गच्छदारं बैठक सकारात्मक जूगु व बुधवाः न्यागूलिं पार्टीया शीर्ष नेतात च्वनाः हाकनं छक्वः सहलह यानाः मन्त्रिमण्डलयात पूर्णता बीगु सहमति जूगु धयादिल । अथेहे वयेकलं थःगु मागया बारे प्रधानमन्त्रीं सम्बोधन यायेगु नं सहमति जूगु व बुधवाः शीर्ष नेतातय् सहलह लिपाः लच्छि न्ह्यः निसें पूर्णता कायेमफूगु मन्त्रिमण्डलं पूर्णता काइगु जानकारी बियादिल ।
अथेहे प्रधानमन्त्रीया राजनीतिक सल्लाहाकार रघुजी पन्तं बुधवाः सुथय् शीर्ष नेतातय् बैठकय् सहमति जुसाः बुधवाः हे मन्त्रिमण्डलं पूर्णता काइगु धयादिल । वयेकलं दलत सहमतिया नाप थ्यंगु प्रतिक्रिया बियादिल ।
सहमतिया निंतिं न्यागू दलया शीर्ष नेतातय् बैठक बुधवाः सुथय् च्वनीगु जूगु दु ।
