संसदीय दलया नेताया निंतिं पौडेलं उम्मेदवारी बीगु
नेपाली कांग्रेसया उपसभापति रामचन्द्र पौडेलं शनिवाः जुइगु कांग्रेसया संसदीय दलया निर्वाचनय् थम्ह दलया नेताय् उम्मेदवारी बीगु घोषणा यानादीगु दु ।
मंगलवाः येँय् रिपोर्टस क्लवय् जूगु ज्याझ्वलय् कांग्रेस उपसभापति पौडेलं उम्मेदवारी बीगू खँ धासें थःगु पक्षय् सर्वसम्मतया कुतः जुयाच्वंगु धयादिल । पार्टी सभापति गिरिजाप्रसाद कोइरालां नं ग्वहालि यायेगु आश्वासन ब्यूगु खँ नं नेता पौडेलं धयादिल । वयेकलं थःगु पक्षय् पार्टी नेतातय्सं समर्थन याइगु दाबी यासें सहमतिया निंतिं सहलह जुयाच्वंगु कनादिल ।
ज्याझ्वलय् वयेकलं माओवादीया जनसरकार अझ न्ह्यानाच्वंगु धासें माओवादीया सेना व ल्वाभ व्यवस्थापन मजूतल्ले शान्ति प्रकृया व संविधान निर्माणया ज्या पूमवनीगु धयादिल । वयेकलं माओवादी शिविरय् च्वंगु ल्वाभ राज्ययात लःल्हायेमाःगु धासें जनसरकार संचालन याइपिंत कारवाही यायेत सरकारनाप इनाप यानादिल ।
