माओवादीं हत्याय छानविन यायेत माग
माओवादी कार्यकर्ता राजेन्द्र फुयालया हत्या रहस्यमय तरिकां जूगु धासें हत्याया छानविनया निंतिं उच्च स्तरिय छानविन आयोग गठन यायेत एकीकृत नेकपा (माओवादीं) माग याःगु दु ।
मंगलवाः माओवादी प्रवक्ता दिनानाथ शर्मां जारी यानादीगु विज्ञप्तिइ अपहरण लिपा रहस्यमय तरिकां हत्या याःगु न्ह्यथंसें घटनाय् संलग्न दोषितय्त तत्काल ज्वना कारवाही यायेत माग यानातःगु दु ।
अथेहे मंगलवाः हे माओवादी उपत्यका कमिटीं छगू पत्रकार सम्मेलन यानाः स्वन्हुया दुने दोषियात मज्वंसाः ६ गते निसें सशक्त आन्दोलन यायेगु ख्याच्वः ब्यूगु दु ।
पत्रकार सम्मेलनय् माओवादी उपत्यका इन्चार्ज हितमान शाक्यं विवेक देवकोटा नाप मिलेजुया युथफोस्रया कार्यकर्तातय्सं फुयालया हत्या याःगु द्वपं ब्यूगु दु । देवकोटा छुं लाः न्ह्यः वाइसिएलया कार्यकर्तातय्सं नुवाकोटय् तुती पालाब्युम्ह एमाले कार्यकर्ता खः ।
पत्रकार सम्मेलनय् शाक्यं माओवादी पाखें नं छानविन यायेत न्याम्ह दुजः दुगु समिति गठन याना:गु धासें हत्या सुनियोनित जूगु दाबी यानादिल ।
