मन्त्रालय तछ्यायेगु अनावश्यक ज्या

प्रधानमन्त्री माधव नेपालं थःगु सरकारय् सहभागी जुइपिं पार्टीतय् चित्त बुझे यायेगु लागिं आः देशय् दुगु थीथी मन्त्रालययात कुचा यानाः निगू निगू दयेकेगु ज्या यायेत्यंगु दु । उकिया निंतिं राजनीतिक दलतय् दथुइ सहमति जुइधुंकूगु व आः छु छु मन्त्रालय तछ्याये माली धकाः बिचाः ब्याकाच्वंगु खँ नं चर्चाय् वःगु दु । आः पिने न्यने दु कथं जलश्रोत मन्त्रालय तछ्यानाः सिंचाई व उर्जा मन्त्रालय दयेकेगु उकथं हे पर्यटन तथा नागरिक उड्डयन मन्त्रालय शान्ति तथा पुनर्निर्माण मन्त्रालय व वाणिज्य तथा आपूर्ति मन्त्रालय नं तछ्यानाः निगू निगू मन्त्रालय दयेकेगु तयारी जुयाच्वंगु खँ पिहां वःगु दु । देशय् दुगु मन्त्रालय तछ्यानाः निगू निगू पिकायेगु ज्या धाथें देशयात मालाः मखु मन्त्रीतय् ल्याः अप्वः खाकेत जक यायेत्यंगु खः । ६०१ म्ह सभासद् तयाः सरकारी धुकूया दुरुपयोग यात धकाः जनतां अपाय्च्वः कुंखिनाच्वंगु इलय् आः मदुगु जक मखु आवश्यक हे मदुगु मन्त्रालय समेत सिर्जना यानाः जनतां पुलातःगु करया ध्यबा दुरुपयोग यात धाःसा व नं छगू कथंया राष्ट्रघात हे जुइ । सरकार राज्य व व्यवस्था प्रति हे जनतायाके घोर निराशा ब्वलनाच्वंगु थौंया इलय् राजनीतिक पार्टीतय्सं बरु जिउसा छगू निगू सीट थःपिंसं हे त्वःताः जूसां त्यागया नमूना क्यनेमाःगु इलय् मन्त्री थपे यायेगु अनावश्यक ज्या यानाः जनतायात अझ निराश यायेगु अपराध याये मजिउ । यदि थथे हे मन्त्रालय तछ्यानाः मन्त्री थपे यायेगु ज्या यात धाःसा भाजु माधव नेपालं ताःहाःगु राजनीति यानाः गुगु क्वातुगु छबी दयेका तःगु खः व फुक्क हे बागमतिया धलय् ल्वाकज्याः वनी । थुकिं वय्कः सचेत जुइ हे माः ।

More Stories Like this