जुट उद्योगया मजदूरतय् पारिश्रमिक सिफारिस
यें (सन्ध्या टाइम्स) / जूट उद्योगय् खनेदुगु समस्या ज्यंकेत व मजदुरतय्त उद्योगं बी फइगु न्यूनतम पारिश्रमिक वैज्ञानिक ढंगं निर्धारण यायेत नीस्वंगु कार्यदलं थःपिनि सुझाव सरकारयात बिउगु दु । वंगु माघं नीस्वंगु कार्यदलं बिउगु सुझावय् मजदुरतय्त न्हिं १४९।६० पैसा व लय् ३६२२।-तका पारिश्रमिक बीमाःगु सिफारिस याःगु दु ।
अथे हे कार्यदलं सरकारयात बिउगु सुझावय् सरकारं जूट उद्योगयात बिया वयाच्वंगु सुविधाया आधारय् श्रमिकतय्गु ज्यालाय् २२।- थप यानाःराहत कथं न्हिं १७२।०३पैसा व लय् ४१६५।- तका जुइगु न्ह्यथनातःगुदु ।
थ्व स्वयं न्ह्यः मजदुरतय्त तलब कथं न्हिं १७५।- तका बीगु निर्णय जुया च्वनेधुंकूगुलिं न्यूनतम ज्यालाय् नं उकथं हे यायेत सिफारिस याःगु दु । लछिया तलबय् धाःसा मेमेगु उद्योगय् स्वयां फरक जुइमाः धइगु खँय् सैद्धान्तिक रुपं सहमति जुइवं उकियात ४६००।- तका यायेत सिफारिस याःगु दु ।
