संचय कोषया ध्यबा लित बीत माग
यें (सन्ध्या टाइम्स) / कर्मचारी संचय कोषं नेपाल विकास बैंकय् दुगु कोषया निक्षेप लित बीत माग याःगु दु । कोष छम्ह अधिकृतं बैंक व वित्तीय संस्थाया ऐन कथं सर्वसाधारणं न्हापां भुक्तानी काये दइगु खःसां संचय कोष ऐन २०१९ कथं थःपिंत न्हापां भुक्तानी जुइमाःगु दावी याःगु दु ।
उगु ऐन कथं कोष लगानी दुगु गुगुं नं कम्पनी बन्द जुल धाःसा अन दुगु जायजेथाय् कोषया हक लगे जुइगु व्यवस्था दु । उम्ह अधिकृतं ४ लाख २५ द्वः कर्मचारीया ७० अर्बं मल्याक ध्यबा दक्वं लगानी जुयाच्वंगु नं धाःगु दु । नेपाल विकास बैंकय् जक कोषया ३३ करोड तका दां संचय यानातःगु दु ।
राष्ट्र बैंकं वंगु छुं दिं न्ह्यः जक विकास बैंकय् च्वंगु कोषया उगु ध्यबा व नेपाली सेना कल्याण कोष १८ करोड जोखिमय् लाःगु व सर्वसाधारणया ध्यबा धाःसा लित बीगु खँ धाःगु खः ।
विकास बैंकया थीथी वित्तीय संस्थाय् झण्डै २० करोड मौज्दात दुसा १७ करोड निक्षेप दु ।
