वर्ल्ड मर्चेण्टया प्रमुख पाखें ८ करोड ठगी
यें (सन्ध्या टाइम्स) / वर्ल्ड मर्चेण्ट बैंकिंग एण्ड फाइनान्स कम्पनीया कार्यकारी प्रमुख विनित मणि उपाध्याययात ठगीया द्वपनय् ज्वंगु दु । सात करोड ७२ लाख तका ठगी याःगु द्वपनय् महानगरिय प्रहरी हनुमान ध्वाखां उपाध्याययात थनया पुतलिसतकं ज्वना यंकूगु खः ।
उपाध्याययात प्रहरीं अख्तियार व राष्ट्र बैंकया निर्देशनय् ज्वंगु खः । विराटनगर स्थित इन्टर्न सप्लायर्सयात याःगु ऋण प्रवाह याःगु इलय् ठगी याःगु धासें बैंकिंग कसूर व सजाय ऐन २०६४ कथं ज्वनागु जानकारी परिसरया छम्ह उच्च अधिकृतं बिउगु दु ।
वंगु माघं हे ठगीया द्वपनय् राष्ट्र बैंकं उपाध्याय नापं फाइनान्सया संचालक ज्ञानेन्द्र श्रेष्ठ व अख्तियारं तत्कालीन कार्यकारी प्रमुख रंजित कोइरालायात ज्वनेत निर्देशन बिउगु खः ।
