अपहरण हल्लां चिनियातय्त दाल
यें (सन्ध्या टाइम्स) / मचा अपहरण यानाहःगु हल्लां म्हिगः बहनी ८ बजे कंगय् छगः माइक्रोबस तोडफोड जुल । मचा अपहरण याना हःगु धासें छु्रं चिनिया नागरिक व नेपाःमित च्वनावःगु ११-०-१४ नम्बरया उगु गाडीइ च्वनावःपिं मनूतय्त नापं आक्रमण याःगु खः । लिपा प्रहरीं उमित ज्वना यंकल । उमित प्रहरीं यंकेवं स्थानीय मनूतय्सं उगु गाडीइ तोडफोड याःगु खः । लिपा प्रहरीं गाडी नं कब्जाय् काल ।
तर बहनी 'सन्ध्या टाइम्स' प्रतिनिधि घटनास्थल थ्यंकाः न्यनेकने याःबलय् अपहरणया घटना धाःसा पुष्टि मजुल । अपहरण यात धकाः गाडी हे तोडफोड यायेधुंकाः नं सुयात अपहरण याःगु गनं अपहरण याःगु धइगु खँ सुनां नं धाये मफु । दमाईत्वाःया मचायात डल्लुं अपहरण यानाः कंगय् हःगु धाःसां अपहरित मचा व वया अभिभावक धाःसा अन मलू । जनसेवा प्रहरीं नं अपहरण पुष्टि मजूगु खँ धाःगु दु । आक्रमणया शिकार जूपिं चिनिया नागरिकत नेपालय् लाया व्यापार याईपं खः धाःगु दु ।
