राजधानी सिबें थिकेगु नाम्चे लागा
यें (सन्ध्या टाइम्स) / झी अप्वः यानाः बेसाःभाः थिके जुल कि 'बजाःभावं सगरमाथा गइन' धकाः नं धायेगु चलन दु । धाथें सगरमाथाया जःखः च्वंगु बजाःया होटल लजया बजाःभाः स्वत धाःसा उकिं चाहिं सगरमाथा हे थीगु सम्भावना खनेदु । सगरमाथा लागाय् लाःगु नाम्चे बजाः व लुक्लां च्वय् च्वंगु जग्गाया भाः थौंकन्हय् राजधानी येँया मूल सतकय् लाःगु जग्गाया भाः स्वयां नं थिके । अले अज्याःगु थासय् च्वंगु होटल लजय् नसात्वँसाया भाः धाःसा हानं राजधानीं नं थी फइगु खने मदु ।
लुक्लां च्वय् थहां वंलिसे अनया बजाःभाः नं थहां वनेगु शुरु जुइ । हिमालया च्वय् थहां वंलिसे मनूतय्त अल्टिच्युट सिकनेसं बचे जुइत क्वाःलः त्वनेमाःगु जुया वइ । तर अनया होटलय् छगू गिलास क्वाःलःया भाः ४५ तका तू । अथे हे मनातःगु ख्यें छगःया मू ७५ तकांनिसें १०० तका तक तू ।
सुथय् च्या त्वनेत पाउरोटी नयेमाःगु खःसा क्वाकातःगु निपा पाउरोटीया मू १५० तका तू । जा नयेगु खःसा छछाःया ४०० तका तू ।
भारी क्वबियाः हिमाल गयेबलय् लः त्वने प्याःचाइ । अन छगः सिसी मिनरल वाटरया भाः २५० तका थ्यंसा कोक छगःया २०० तका तू । ख ला अज्याःगु तापाःगु थासय् नं ममः नये मदुगु मखु । तर अन भेज ममः छगू प्लेटया २८० तका काइसा चिकेन ममःया ३०० तका काइ ।
थिके धकाः हानं गनं होटलय् च्वं वनेबलय् पिनें न्याना यंकागु नसात्वँसा अन नये मदु । यदि नःगु सिल धाःसा द्वःछिंनिसें झिंन्यासः तका तक बं पुले मालेयः ।
