राष्ट्रपतिया पलाः बाध्यकारी : रक्षामन्त्री
रक्षामन्त्री विद्यादेवी भण्डारीं देशय् तःधंगु दुर्घटनापाखें बचे यायेत राष्ट्रपतिं बाध्य जुया वयेकलं पलाः ल्ह्वनादीगु खँ धयादीगु दु ।
मंगलवाः येँय् जूगु छगू ज्याझ्वलय् वयेकलं राष्ट्रपतिया पलाःया बचावा यासें उगु पलाः उजित जूगु धयादिल । वयेकलं राष्ट्रिय सुरक्षा नीतिइ सेनाया विषययात स्पष्ट रुपं दुथ्याकेमाःगु धासें राष्ट्रिय सुरक्षा नीति मजबुत जुसाः सेनाया विषयस विवाद मवइगु दाबी यानादिल ।
मन्त्री भण्डारीं सुरक्षा निकायं गवलें नं नागरिक सर्वोच्चताया आदेश अवज्ञा मयाःगु दाबी नं यानादिल । वयेकलं नागरिक सर्वोच्चताया विषय ल्ह्वनाः सुरक्षा निकाययात कमजोर यायेगु षडयन्त्र जुयाच्वंगु धयादिल । अथेहे माओवादी सरकारयात लक्षित यासें रक्षामन्त्री भण्डारीं परिवर्तनयात आत्मसाथ यायेत सुरक्षा निकाययात सशक्त मदेयेकूसिं मानमर्दन याःगु द्वपं बियादिल ।
