गृह मन्त्रालयया अडान त्व:ती : प्रधानमन्त्री

प्रधानमन्त्री माधवकुमार नेपालं मधेशी जनअधिकार फोरम (गच्छदार पक्ष)या नेता व उपप्रधानमन्त्री विजयकुमार गच्छदारया गृहमन्त्रालयया माग त्वःतेत इनाप यानादीगु दु ।

संयुक्त लोकतान्त्रिक मधेशी मोर्चाया स्वंगुलिं पार्टीया नेतात नापलायेगु झ्वलय् प्रधानमन्त्री नेपालं थःगु पार्टीं गृहमन्त्रालय् छवइम्ह नेताया नां चयन यानाः सिफारिश नं यायेधुंकूगु धासें थुकी अडान मकायेत इनाप यानादीगु खः । अथेहे प्रधानमन्त्री नेपालं गृहया माग यानाः एमाले दुने थःत थाकूगु अवस्थाय् मलाकेत नं इनाप यानादीगु खः ।

तर फोरमं धासाः थःगु माग अझ नं कायम हे जूगु खँ धाःगु दु । प्रधानमन्त्री नापया खँल्हाबंला लिपाः मधेशी मोर्चा आः थःगु धारण क्वछीत बैठक च्वनाच्वंगु दु ।