माओवादी नेतात पाखें संविधानविदत नाप सहलह
एकीकृत नेकपा (माओवादी)या नेतातय्सं न्हूगु संविधानया विषयस कानुनविद व संविधानविदत नाप सहलह याःगु दु ।
मंलगवाः सुथय् जूगु सहलहलय् न्हूगु संविधानय् निर्वाचन प्रणाली व साशकीय स्वरुप गथे जुइमाः धइगु विषयस विज्ञत नाप सहलह याःगु खः । विज्ञतय्सं प्रादेशीक सूची समानुपातिक निर्वाचन प्रणाली नालेमाःगु सुझाव ब्यूगु खः । अथेहे केन्द्र, प्रदेश व स्थानीय तहलय् ब्यागलं ब्यागलं हे निर्वाचन प्रणली छ्यलेत बः ब्यूगु दु । साशकीय स्वरुप कथं कार्यकारी राष्ट्रपतिया व्यवस्था जुसाः राष्ट्रपतिया निर्वाचन प्रत्यक्ष रुपय् यायेमाःगु व प्रादेशिक सभां राष्ट्रपतियात मत बी देयेमाःगु व्यवस्था जुइमाःगु सुझाव विज्ञतयसं ब्यूगु खः ।
सहलहलय् माओवादी अध्यक्ष पुष्पकमल दाहाल 'प्रचण्ड', वरिष्ठ नेता डा. बाबुराम भट्टराई, नेता नारायणकाजी श्रेष्ठ, पुलांम्ह प्रमुख निर्वाचन आयुक्त भोजराज पोखरेल, निर्वाचन विज्ञ डा. विरेन्द्र मिश्र, नागरिक समाजया श्याम श्रेष्ठ लगायतं ब्वति काःगु खः ।
