हनिमय् न्यंकया नेपामितय्सं भारतीय ज्यादति विरुद्ध एक्यवद्धता

भारतं नेपाःया सीमा अतिक्रमण यायेगु व नेपालय् थीथी ईलय् यानावयाच्वंगु ज्यादतीया विरुद्ध हनिमयन्यंकया नेपामितय्सं उकीया विरोध याःगु दु । 'नेपाःया भूमीइ भारतया ज्यादती विरुद्ध विश्वव्यापी प्रदर्शन यायेगु न्हि' (Global Day of Action Against Indian Aggression in Nepal) कथं थौं १५ जुन सोमवाः विश्वन्यंक छरे जुयाच्वनाच्विपं नेपामितय्सं थुकी एक्यबद्धता प्वंकूगु दु ।

देय् दुने व थीथी कारणं देय् पिने लानाच्वंपिं लखौंया ल्याखय् दुपिं नेपामितय्सं थीथी माध्यम पाखें भारतीय विस्तारवाद, नेपालया भूमी याःगु सीमा अतिक्रमण व ईलय्व्लय् भारतं यानाच्वंगु ज्यादतीया विरोध याःगु ख: । अप्व धाइथें नेपामीतय्सं अनलाईन माध्यम, थीथी बल्ग, सामाजिक संजाल लगायत माध्यमं थुकी एक्यबद्धता प्वंकूगु ख: ।

अथेहे गलिखें देया भारतीय दुतावसाय् वनाः विरोध पौ लःल्हायेगु व दुतावास न्ह्यने विरोध प्रदर्शन यायेगु ज्या नं जूगु दु । नापं थीथी देशय् च्वनाच्वपिं नेपामित मुनाः थुकी एक्यबद्धता प्वंकीगु कथं ज्याझ्वः नं याःगु खः ।

लुमंकेबहजू, भारत नाप नेपाःया नीखुगू जिल्ला स्वाःगु दुसाः उकी नीनिगू जिल्लाया करिब खुइद्वं हेक्टर भू-भागय् भारतं अतिक्रमण यानाच्वंगु दु । अतिक्रमणया लिप्पां श्रृंखला कथं निवा: न्ह्य: भारतीय सुरक्षा बलं दाङ जिल्लाया प्यंगू गाविसय् अतिक्रमण यायेगु नापं नेपामितय्त ज्यादती याःगु खः ।