गठबन्धन दलत दथुइ सहमति जुइमफुत
मन्त्रिमण्डल विस्तार यायेगु निंतिं सत्ता नेतृत्व यानाःच्वंगु नेकपा (एमाले) व सत्तासाझेदार प्यंगू दल दथुइ जूगु सहलह बिना निष्कर्ष क्वचाःगु दु ।
म्हिग यायेत्यंगु मन्त्रिमण्डल विस्तार मधेशी मोर्चाया स्वंगुलिं घटकतय्सं असहमति प्वंकेवं मन्त्रिमण्डल विस्तार यायेगु ज्या लिछ्याःगु खसाः उकीया बारे सहमति मालेत थौं च्वंगु बैठकय् धासा: छुं सहमति जुइमफुत ।
सोमवाः प्रधानमन्त्री निवास बालुवाटारय् एमाले, कांग्रेस, मधेशी जनअधिकार फोरम (गच्छदार पक्ष), तराई-मधेश लोकतान्त्रिक पार्टी व सद्भावना पार्टी दथुइ मन्त्रिमण्डल विस्तार यायेगु व सत्ता साझेदार दलत दथुइ खनेदुगु असमझदारी चीकेगु बारे सहलह जूगु खसां सहमति धासाः जुइमफुत । प्रधानमन्त्रीया सल्लाहकार रघुजी पन्तया कथं फोरमया नेता विजयकुमार गच्छदारं सहलह यायेत अझ छन्हु माग याःगुलिं थौं सहमति जुइ मफूगु ख: ।
सहलहया झ्वलय् मधेशवादी दलतय्सं कांग्रेस व एमालें थःपिं नाप सहलह मयासें याःगु मन्त्रालय भागबन्डा थःपिंत अमान्य जुइगु खँ तःगु ख: । अथेहे सरकार गठनय् थःपिंसं याःगु योगदानया कदर मयाःगु धासें मधेशी दलतय्सं आपत्ति प्वंकूगु ख: । नापं गठबन्धन सहमति कथं न्ह्यावने माःगु धारणा प्वंकूगु खः । बैठकय् मधेशी दलतय्सं गृह, जलस्रोत, संचार लगायत मन्त्रालय बीया सम्मानजनक तरिकां मन्त्रिमण्डलय् दुथ्याकेमाःगु माग नं याःगु ख: ।
बैठक लिपाः सदभावनाया अध्यक्ष राजेन्द्र महत्तों सहमति बिपरित वनेगु रोगया कारणं प्रचण्डया सरकार पतन जूगु खँ न्ह्यथंसें थ्व सरकारं पूर्णता कायेस्वयां न्ह्यहे थ्व रोग खनेदुगुलि अपत्ति प्वंकादिल । एमाले नेतातय्सं धासाः न्यागू दलया बैठक सहमति नापं थ्यंगु प्रतिकृया ब्यूगु दु ।
बैठकय् प्रधानमन्त्री माधवकुमार नेपाल, एमाले अध्यक्ष झलनाथ खनाल, कांग्रेस महामन्त्री विमलेन्द्र निधि, कृष्णप्रसाद सिटौला, फोरमका नेता व उपप्रधानमन्त्री विजय गच्छदार, शरतसिंह भण्डारी, तमलोपा अध्यक्ष महन्थ ठाकुर, हृदयेश त्रिपाठी व सद्भावनाका अध्यक्ष राजेन्द्र महतों ब्वति का:गु ख: ।
म्हिग मधेशी दलतय्सं कांग्रेस व एमालें दक्व शक्तिशाली मन्त्रालय थिपंसं काःगु व मन्त्रालय भाडबन्डा यायेगु ईलय् थःपिं नाप सहलह मयाःगु धकाः विरोद्ध याःगु खसाः उगु विरोधया कारणं म्हिग विस्तार यायेत्यंगु मन्त्रिमण्डलया ज्या लिछ्याये माःगु खः ।
