थौंयात मदयेक मगाःम्ह नेत्री शैलजा
नेपाली कांग्रेसया छम्ह प्रमुख नेत्री खयां नं योगदान धाःसा मुक्कं नेपाःया निंतिं हे महत्वपूर्ण जूम्ह मय्जु शैलजा आचार्य अन्ततः ताःहाकःगु विरामी लिपा शुक्रवाः मंत । नेपाःया न्हापांम्ह मिसाम्ह उपप्रधानमन्त्री व कांग्रेस दुने नं उपसभापति तक जुयादीम्ह वय्कः नेपाःया सम्पूर्ण मिसा समाजया निंतिं तःधंगु प्रेरणाया श्रोत खः । वय्कःया निधन कांग्रेसया निंतिं तःधंगु क्षति ला ख हे खः लिसें मुलुकया लागिं नं छगू पूवंके मफइगु ह्याकिं जुया बिउगु दु ।
कांग्रेस दुने सुंलिसे सम्झौता मयासे थःगु बिचाः निर्धक्क तयाः नेतृत्वयात चेतावनी बियाच्वनीम्ह छम्ह अविचलित नेत्री खः वय्कः । हरेक इलय् छुं कि छुं न्हूगु ज्या यानाः वा बिचाः न्ह्यःने हयाः वय्कः पार्टी व देय्या राजनीतिइ चर्चाया केन्द्रय् वया हे च्वनी । २०४७ सालय् जूगु चुनाव लिपा वय्कः कृषि मन्त्री जुयादिल तर थःगु हे मन्त्रालय दुने व्यापक भ्रष्टाचार दु व थम्हं उकियात चीके मफु धासें वय्कलं पदं राजीनामा बियादिल । लिपा जलश्रोत सहित उपप्रधानमन्त्री जुयादीबलय् नं वय्कलं अज्याःगु हे उच्च नैतिकता क्यनाः पदं राजीनामा बियादीगु खः । वय्कःया स्वभाव व थज्याःगु हे नैतिकवान चरित्रं जक वास्तवय् कांग्रेसयात पतनपाखें बचे याये फइगु खः। वय्कः थेंज्याःम्ह नेत्रीया अभावय् थौं कांग्रेस दुने सुजाता कोइराला थेंज्याःपिं अनैतिक नेत्रीतय् हालीमुहाली जुयाच्वंगु दु । देशय् वःगु राजनीतिक हिउपालं नेपाली जनताया जीवनस्तरय् हिउपाः हये मफुगु खनाः वय्कः अतिकं निराश जुयादीगु खः । थ्व हिउपाःयात धाथें सार्थक यायेगु हैसियत दुपिं निम्ह प्यम्ह नेतात मध्यय् छम्ह वय्कः नं खः वय्कलं थःगु भूमिका पूवंके मखन ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
